UC-CBM swimming club miratsada dayon

Ang University of Cebu-Cebu Blue Marlins Swimming Club mikabkab og pito ka golds, walo ka silvers ug 15 ka bronzes sa pagsugod sa Iloilo Dinagyang Age-Group Swimfest 2008 kagahapon didto sa Iloilo Sports Complex sa naasoy'ng dakbayan.

Si Noel Caneda sa UC maoy nangulo sa kadaugan nga mihakot og duha ka bulawan sa boys' 15-17 under 400-m freestyle ug sa 200m backstroke, samtang ang iyang teammate nga si Michael David Vega misapyaw og bronze sa 200m backstroke.

Nakabitbit sab og silver si Caneda gikan sa 50m backstroke.

Sa pikas bahin, laing duha ka UC swimmers nga sila si Paula Abigail Vega mitiltil og bulawan sa 400m freestyle ug duha ka silvers sa 50m ug 200m backstroke, samtang si Arlete Baller mihakot og og bronze sa mao gihapon nga event.

Si Anthony Linn Navarro sa Cebu Eastern College ug nahimong kabahin sa CBM mikabkab og duha ka gold medals gikan sa boys 9-10 class' 200m freestyle ug 100m backstroke, samtang ang iyang manghod nga babaye nga si Lyh Ann, naka-silver sa 7-8 under sa 100m breaststroke.

Sa iyang bahin, si Beth May Arellano nakasibot sab og bulawan sa 9-10 under sa 200m freestyle.

Ang hiniusang paningkamot nilang Robin Jakobsen, Renan Tapang, Israel David ug Anthony Linn Navarro nakabira sab og gold sa boys' 10-under 4x50m freestyle relay, samtang ang mga babaye sa CBM mikabkab og silver.

Si Tapang  midaog sab og silver, si Jackobsen midaog sab og silver ug bronze ug si Dannielle Angela Biscocho mihakot og duha ka bronzes sa maong kompetisyon nga gitukod sa Iloilo Sea-Warriors Swim Club Incorporated ug gipaluyohan sa Philippine Amateur Swiming Association (PASA).