La Fortuna Cup 2 sugdan karon

Duha ka Fil-Ams gikan sa Guam moabot dinhi sa Sugbu aron pag-reinforced sa University of San Carlos (USC) Warriors sa ilang malisod nga tahas karong hapon batok sa University of San Jose-Recoletos (USJ-R) Jaguars sa pagbukas sa La Fortuna Cup 2 diha sa Cebu Coliseum.

Si Alfred Vitug, 5'11 nga haom sa point guard ug off-guard  possessions ug si JP Cruz, 5'8 forward maoy mopalig-on sa Warriors niing usa ka semana nga  kumbati.

Kini maoy gipahibalo sa bayaw ni coach Jay Ramirez nga si ex-pro Peter Jao atol sa press conference kagahapon didto sa La Fortuna-Sto. Niño branch.
Ang laing magkumbati karon mao ang Southwestern University (SWU) Cobras batok sa rookie team nga Asian College of Technology (ACT) Cyber Knights.

Lima  ka teams ang mobanat sa torneyo  apan ang Salazar Institute of Technology (SIT) Skyblazers mo-bye karong adlawa ug ugma pa mopakita’g aksiyon sa maong torneyo.

Ang University of the Visayas (UV) Green Lancers   dili mosalmot sa  La Fortuna Cup 2   apan  moapil kini sa  Sinulog Cup.

Usa sa labing  importanteng  butang nga gituki  atol sa press conference  duwa mao ang paghatag og assistance ngadto sa player.

Matud pa ni league organizer ug businessman Lorenzo 'Chao' Sy nga dili siya magdumili pagtabang simbako kun adunay player nga ma-injured sa panahon sa liga.

Ang top two teams sa maong torneyo  nga gipaluyohan sa Hotel Fortuna, La Fortuna Bakery, Pepsi Cola ug Nature's Spring maoy magsangka alang sa kampiyonato, samtang ang no. 3 ug no. 4 teams  mag-ilog alang sa ikatulong dapit.
Ang  makampiyon mobulsa  og P15 mil,  mopahiluna sa ikaduhang dapit   makadawat og P10 mil ug ang  molingkod sa ikatulong puwesto modawat og P5 mil. 

Ang  mga  tiket mahimong mapalit  sa tag P100 alang sa ringside, P50 sa lower box ug P20 sa general admission.

Ang mga tinun-an makakuha og  50 porsiyento nga diskuwento  kun aduna kini ikapakitang identification card sa ilang tunghaan.