84 ka players moapil sa CCC Grand Reunion

Ang kanhi PBA star nga si Rey Yncierto usa sa kusganong mi-organisar sa umaabot nga UC (kanhi CCC) Alumni Grand Homecoming karong Enero 26 diha sa Cebu Coliseum mibutyag nga mokabat sa 84 players ang mosalmot sa ilang hudyaka pinaagi sa way puas ug tibuok adlaw nga kompetisyon aron pagsaulog sa ilang talagsaong reunion.

Ang tanang mga kanhi magduduwa sa CCC sukad pa sa panahon sa CAAA giawhag sa pagsalmot sa ilang exhibiton games aron mahimo daw pista kasadya ang nahisgutang reunion nga gipasiugdahan sa grupo sa “UC in USA” nga gilangkuban nilang Yncierto, Jofre Macoy, Caesar Borromeo, Percius Curugan, Allan Ceniza ug Benjamin Ocariza, uyoan ni Dondon Hontiveros sa Magnolia Beverage Masters sa PBA.
Unang misikad sa Cebu Amateur Athletic Association (CAAA) ang CCC Executives sa tuig 1968 ug sa ilang rookie season ug mikumbati kini sa finals batok sa University of the Visayas (UV) Green Lancers diin sila gilubong og 31 puntos sa iskor nga 63-94.

Ang Lancers niadtong tungora gipangulohan ni kanhi Olympian  Manny Paner, ang garbo sa Philippine basketball ug garbo sab sa tibuok Naga City nga ubos karon sa pang-gobiyerno ni Mayor Val Chiong kinsa magduduwa-kanhi sa CCC.
Sa kasaysayan, ang Batch '86 nilang Yncierto unang midaog og korona sa CAAA sa tuig 1981 ug ug  lima ka tuig ang milabay lain na sab nga korona ang ilang nalangkat niadtong tuig 1986 nga maoy giila nga labing malampuson nga batch sa CCC tungod kay ilang gipasigarbo nga upat kanila nakaduwa sa PBA, ang labing daghan nga nahatag didto sa pro-league sa usa lang ka batch.

Sila si Yncierto ug Carlito Mejos nakaduwa sa PBA sa Pepsi Cola, samtang sila si UC coach Roel Gomez ug Allen Sasan nakaduwa sab sa Alaska Aces.

Lakip sa mga mopakita’g gilas sa exhibition games mao ang pinaka-utokan nga basketbolista sa UC nga si Kenneth Kern Sesante kinsa maoy 2nd placer sa Customs Brokerage Licensure exams duha na ka tuig ang milabay. Si Sesante manghod sa  The Freman Newspaper ug Banat News photojournalist Iste Sesante-Leopoldo.

Ang mga miyembro sa Batch '86 naglakip nilang Yncierto, Gomez, Mejos, Sasan, Percius Curugan, Caesar Borromeo, Jofre Macoy, Tata Abellana, Armen Reunido, Porferio Tuse ug Joshua Alguno. Ang coaching staff mao sila si head coach Joaquin Rojas ug assistants Mariano 'Dodong' Agas ug Eddie Montalban, samtang ang utility/statistician mao si Rolando Adarna ug ang team manager hangtod ning panahona mao si Atty. Baldomero C. Estenzo.