Bobby Pacquiao mo-away sa Vegas

Molat-ang lang og duha ka adlaw ang away sa managsuong Manny ug Bobby Pacquiao didto sa Las Vegas.

Kini human si Top Rank big boss Bob Arum pormal nga mi-anunsiyo kagahapon nga si BobPac gikatakda nga moladlad sa iyang abilidad sa Las Vegas karong Marso 13 batok sa wala pa matinong kontra.

Matud pa ni Arum nga ang maong non-title fight nga gikatakda sud sa 10 ka hugna maoy labing unang ipasalida nga away sa telebisyon sa maong promosyon nga gitambayongan nila'g padagan sa VERSUS network.

Ang umaabot nga away ni BobPac duha lamang ka adlaw ang lat-ang sa dili pa ang mas sikat niyang maguwang nga si Manny Pacquiao mohagit ni WBC super feathweight champion Juan Manuel Marquez sa gikahinaman nilang "rematch" nga maoy main event sa "Unifinished Business" karong Marso 15 didto sa Mandalay Bay Resort and Casino.

Sa gipadayag ni Arum, hayan nga hingpit na sab nga napapha ang gilaraw'ng IBF Intercontinental super featherweight  title  fight  alang ni Bobby (28-13, 13KOs) sa labing una untang pro boxing card didto sa Dubai.

Si BobPac katapusang ni-away niadtong Nobiyembre 23 didto sa Morongo Casino Resort and Spa sa Cabazon, California diin iyang gipasurender sud lamang sa upat ka hugna ang Mehikanong si Fernando Trejo.