Ang 110 ka mga sakop sa Philippine Paralympic Team nga naglakip sa tulo ka Sugbuanong atleta ang migikan kagahapon alang sa 4th ASEAN Paragames didto sa Nakhon Ratchasima, Thailand.
Migikan og sayo ang nasudnong koponan aron pag-anad sa klima ug pagsinati sa ilang kaugalingon sa playing venues, nga hapit tanang binyu nga gigamit atol sa 24th Southeast Asian Games sa miaging tuig.
Ang duwa pormal nga buksan karong Enero 20 ug ang kompetisyon banatan sunod adlaw ug ang closing ceremony gikatakda karong Enero 27.
Ang mga Sugbuanong atleta nga sila si Arnold Balais, Noel Gonzales ug Roselyn Ocampo mokumbati sa managlahing duwa.
Si Balais nga usa ray tiil, kinsa mo-compete sa swimming events sa katapusang higayon, maninguhang maka-gold sa dili pa mobali sa athletics.
Ang double amputee nga si Gonzales mobanat sa 200-meter freestyle. Si Gonzales mi-ensayo uban sa UC Blue Marlins Swimming Club ubos ni coach Roland Alvarez sa wala pa siya mobiya paingon sa Manila.
Matud pa ni Alvarez dinhi sa Banat News nga si Gonzales adunay dakung kahigayonan nga makahakot og bulawan.
Samtang si Ocampo adto gihapon mopakita'g aksiyon sa wheelchair event ug nagtinguha sab kini nga mokabkab og bulawan.
Niadtong tuig 2006, ang Pilipinas nihakot og 19 golds, 39 silvers ug 37 bronzes medals.