Ang Abellana National School (ANS) ug Don Bosco Technology Center (DBTC)-A booters maoy nanghawod sa 54th Don Bosco Founder's Day Under-12 ug Under-17 football tournament sa miaging adlaw didto sa Don Bosco Seminary fields.
Dili makatuo ang high-spirited nga ANS sa pagdughit nila sa Under-17 title karong tuiga dihang ilang gipukan ang crowd- favorite DBTC-A sa iskor nga 1-0 sa ilang kulbahinam nga championship battle.
Wala gayod makatuo ang ANS sa ilang kadaugan tungod kay napilde man sila sa DBTC-A atol sa elimination rounds hinungdan nga ikaduha lang sila sa rank sa Bracket A.
Apan nagmalampuson sila dihang ilang giguba ang lig-ong depensa sa DBTC-A.
Sa kampo sa DBTC-A, gi-angkon nila nga huyang gyud ang ilang puwersa atol sa duwa tungod kay ang ilang duha ka mga sinaligan ug
mga maayong center defenders nga sila si Charles Caballes usa ka 15-Under National Player ug si Plando na-injured hinungdan
nga wala sila makaduwa sa finals.
Ang ilang manghod nga DBTC-A, wala makasinati og susama nga kaagi dihang ilang gipangusgan ang ilang pagpanghawod human nila gipalukapa ang bisitang koponan Colegio de Sta. Rita Football Club, 4-0 atol sa Under-12 championship match.
Ang host DBTC-A, nanigurado gyud nga ilang madala ang titulo karong tuiga dihang wala gyud nila pa-iskora ang nag-inusarang bisitang koponan gikan sa San Carlos City, Negros Occidental.
Ang 54th Don Bosco Founder's Day bootfests gipasiugdahan ni Rector Fr. Lan Guiao uban sa suporta sa ilang principal nga si Fr. Jerome Constantino ug event organizer ug DBTC coach Glenn Ramos.