Doerr, Chiongbian naghari sa Sugbu Marathon 2008

Wala makapugong ang uwan nilang Juergen Doerr ug Emily Chiongbian sa pagdughit sa 21K men and women executive division titles sa Sugbu Marathon 2008 kagahapon didto sa Sumilon Road sa Cebu Business Park, ning dakbayan.

Ang German-national nga si  Doerr nanghawod sa 21K men's executive class human niya gitapos ang lumba  sa oras   nga 1:39:04.

Mi-okupar sa ikaduha mao si Napoleon de la Torre, kinsa mitapos sa lumba sa oras nga 1:42:32.

Sa pikas bahin, si Emily Chiongbian mao sab  ang midominar sa 21K women's executive division nga mitabok sa finish line  sa oras  1:54.05.

Si Vicky Vossler maoy mipahiluna sa ikaduhang l (2:07:00), samtang si Girlie Ong maoy mipatong sa ikatulo nga mioras og 2:30:28.

Sa   doctor’s category, si Dr. Glen Cang maoy midaog sa  titulo nga  mi-oras og 2:16:10 sa iyang paglabang sa finish line.

Gisundan kini ni  Dr. Peter Mancao nga maoy miangkon sa  ikaduhang dapit sa oras  nga  2:16:28.

Nasayran, si Mancao miapil sa New York Marathon sa miaging tuig  uban si  Dr. Yong Larrazabal.

Ang mga doktor nga sila si Michael Jeremy Tabaloc (2:32:21) ug Alex Junia (2:38:48) maoy milangkat sa ikatulo ug ikaupat nga lugar.

Sa laing bahin, si Hidelito Ngujo maoy nangulo sa 6K MEPZ men's division nga mitapos sa dagan sud lang sa  23 minutos ug 46 segundos.

Misunod alang sa ikaduhang dapit mao  si Randy Escartin  sa oras nga  24:34 ug ang mi-okupar sa ikatulo nga dapit mao  si Glen Ycong nga mitapos sa oras nga  25:15.

Sa  6K MEPZ  women's division, gibira sab ni Glady Sumili ang unang luna human niya gitapos ang lumba sa oras nga   31 minutos ug 52 segundos.

Si Edna Base nga adunay 35 minutos maoy mipahiluna sa ikaduha ug si Rosana Sajulga maoy mipuwesto  sa ikatulo  nga dapit sa iyang oras nga 35:53.

Sa 3K kiddies category, sila si Julius Gallero ug Haziel Retavale maoy midominar sa sa tagsa-tagsa nila ka dibisyon.

Gitapos ni Gallero ang tres kilometros nga dagan sud lang sa 16 minutos ug 20 segundos, gisundan ni  Dexto Secong nga mioras og 17:30 ug Lord Mc Lou Cuyog (17:37) maoy miplastar sa ikatulo nga dapit.

Samtang si  Retavale nga nanghawod  sa  mga babaye mitapos og dagan  sud lang sa 15 minutos ug dos segundos, gisundan kini nilang  Romylin Niña Ignacio  (18:09) ug Kresha Mae Ygot  (18:20).

Ang technical support sa nahisgutang lumba naglakip sa Cebu Road Runners Club, Sight First Running Club ug CSI-Cebu.

Ang Sugbu Marathon 2008 gipaluyohan usab  sa Tubig Ultra Pure, Globe Telecom, Rose Pharmacy, Hanga Bai Buffet and Resto, Timex, Sight First Clinics, Makimsa Apparels, Andot Sports, Kumon Math and English, Fun and Learn, Tim Transport, Pharmaton, Leona’s Bakeshop, 3L Catering, Riverwatch, Cebu Island Tours ug  Bo’s Coffee.