Ang bisitang Sta. Rita Football Club (SRFC) booters maoy nag-una sa mga mananaog sa pagsugod sa duha ka adlaw nga 54th Don Bosco Founder's Day Under-12 and Under-17 football tournament kagahapon sa Don Bosco Seminary fields.
Ang nag-inusarang out-of-town team gikan sa San Carlos City, Negros Occidental mipukan sa Don Bosco Technology Center (DBTC) - B, 1-0, sa Under-17 Class.
Sa laing bahin, wala sab magpaulahi ang DBTC-A ug ilang gipildi ang Abellana National School (ANS) sa iskor nga 3-1.
Nakabawi sab ang ANS dihang ilang gidabodabohan ang Sacred Heart School-Jesuit (SHS-J), 3-0.
Hinuon, mibawos usab ang SHS-J dihang ilang gikusokuso ang San Roque United Football Club (SRUFC), 1-0.
Sa laing aksiyon sa Under-17, ang Cebu International School (CIS) midaog batok sa Football Club Inter-Cebu (FCIC) sa iskor nga 4-1.
Sa Under-12 category, parehas og senaryo ang nahitabo dihang ang SRFC mipukan sa host Don Bosco Technological Center (DTBC) sa iskor nga 1-0.
Apan wala makaparehas ang ilang suwerte kay sa ilang maguwang sa Under-17 division kay miluhod sila sa DBTC-A, 6-0.
Sa laing bahin, ang Sacred Heart School-Jesuit midaog batok sa Football Club Inter-Cebu (FCIC), 6-0.
Sa pagsuwat niini, ang nahabiling mga duwa sa Under-17 ug Under-12 divisions padayon pang nagduwa.
Ang semifinals gitakda karong ala-1:00 sa hapon ug sundan dayon kini sa kumbati sa kampiyonato.