"Mal!"
Maayong adlaw sa tanang mga magduduwa og bilyar diha sa Pulpogan, Consolacion. Hinaut nga kanunayon ninyo ang ang pagsunod ning bugtong column mahitungod sa billiard sport sa tanang pamantalaanan sa Kabisay-an, labina gyud sa atong texter.
Alang sa benepisyo sa atong texter ug sa uban nga wala pa makasugat sa terminong "mal," mao kini ang termino nga gigamit paghulagway sa hitabo diin accidentally, matandog, matuhil, masabod ug mahikap sa magduduwa o sa iyang tako ang bolamano o object ball sa ibabaw sa lamesa sa wala pa siya motira.
Kining maong termino dili ika-apply sa sitwasyon nga cue ball in hand. Kasagaran, maka-commit og mal ang magduduwa kun katag kaayo ang mga bola sa ibabaw sa lamesa ug lisud kaayo ang pagpanako. Kun matandog ang bola, object ball man o bolamano sa dili pa siya motira, kana ang gitawag og mal. Bisan unsang parteha sa lawas sa player ang makatandog sa bola sa dili pa motira ang magdudula, mao kanay gitawag og mal. Kun matandog sab sa tako ang bolamano sa dili pa motira ang player, kana ang gitawag og mal.
Kining maong matang sa violation panagsa lang mahitabo sa disiplinadong magdudula. Mga 2% ra ang kahigayonan nga maka-commit og mal ang mga bilyarista nga mogamit og dagkung lamesa. Hinuon, atong mamatikdan nga extra careful sila mahitungod niini. Ang pag-commit gud og mal posibleng makapausab sa sitwasyon sa dula kay ang sagad nga ruling sa referee niini mao man ang turn-over. Nga sa atop pa, ang kaatbang sa magdudula nga naka-[commit og mal maoy hatagan sa turno sa pagtira.
Bahin sa kamot sa magdudula, ang akong nabantayan nga maoy sagad makatandog sa ubang object ball sa dili pa motira ang magdudula mao ang kumingking ug pulsohan. Kun ma-mal gani, makahigayon ang kaatbang sa pag-ilog sa bentaha sa dula.
* * *
(Mga sugyot ug pakisayod? Text sa 0910-8105522)
- Latest
- Trending
