Kulbahinam dayon nga aksiyon ang mosikad sa bag-ong tuig gumikan sa pagpahigayon sa Cebu Zonals alang sa 2008 National Students' Basketball Championships karong Enero 9-13 diha sa Cebu Coliseum.
Ang motapos sa nag-unang duha ka puwesto sa lima ka adlaw nga kompetisyon nga gipaluyohan sa Hotel Fortuna, La Fortuna Bakery, Pepsi Cola ug Nature's Spring makaangkon og katungod nga maoy mo-representa sa Sugbu sa National Students Championships karong Pebrero 25 hangtud sa Marso 5 dinhi gihapon sa Coliseum.
Hinuon si event organizer ug BAP-SBP Cebu Province director Lorenzo 'Chao' Sy nagkanayon nga adunay dakung posibilidad nga ang third placer moduwa sab sa National Finals gumikan kay gitugotan man ang Cebu nga mopadala og tulo ka teams isip "token" kay mao man kini ang host sa torneyo.
Nagkanayon si Chao Sy nga unom na ka teams ang mipadayag sa ilang interes nga mopakita'g aksiyon sa labing unang pinaksitay sud sa korte karong tuiga.
Kini naglangkob sa seven-time CESAFI champion University of the Visayas (UV) Green Lancers, runner-up University of San Carlos (USC) Warriors, University of San Jose-Recoletos (USJ-R) Jaguars, Southwestern University (SWU) Cobras, Asian College of Technology (ACT) Cyber Knights, ug Salazar Colleges of Science and Institute of Technology (SCSIT) Skyblazers.
Midugang sab si Chao Sy nga ila sab nga gidapit ang ubang CESAFI member schools sama sa University of Cebu (UC) Webmasters, University of Southern Philippines (USPF) Panthers ug Don Bosco College (DBC) Greywolves pagsalmot sa kompetisyon.
Gawas sa men's collegiate division, lain pang mga kategoriya nga banatan mao ang women's ug juniors.
Gibutyag ni Chao Sy nga ang format sa torneyo mag-agad sa gidaghanon sa mga entrante.
Alang sa dugang kasayoran, niadtong buot magpakisayod mahimong motawag ni Chao Sy sa (032) 254-0741.