Jubenile midaog 2 ka titulo

Si Jubenile Abellar nidaog og duha ka titulo -- open production ug intermediate open categories  sa Baybay City Motocross Invitational Race nga usa sa mga highlights sa pangilin sa Baybay,  Leyte.

Niadtong Disyembre 28, si Abellar nisakmit sa expert title human iyang gipangpilde ang mga tadhang mga riders sa final leg sa 2007 Motosuit Motocross Series sa San Fernando sa habagatang Sugbu.

Si Abellar, ang anak ni Jubal Abellar, usa sa mga pioneering motocross riders sa Sugbu nipukan nilang Marc Balbat ug Christian Capusyon sa open production class.

Si Abellar nikolekta  og laing titulo sa intermediate class human iyang gipukan sila si Elfie Ayco ug Capusyon.

Hinuon, ang maguwang ni Jubenile nga si Jubanie pakyas pag-angkon og titulo ug  mipahiluna sa ikaduhang dapit sa novice production class nga gidominar ni Manit Vera. Mikompleto sa top three mao si Bebot Gloria.

Sa laing sibling showdown, sila si Peewee ug PJ Galia maoy midaog sa nag-unang duha ka dapit sa mga riders nga nag-edad og siyete  anyos ug paubos. Si Jajie Pilapil nitapos sa ikatulo sa maong karera.

Sa mini class, si Enson Pilapil nisanta sa tinguha ni Peewee alang sa double victory, samtang si Jimbo  Membrebe nalandig sa ikatulong dapit.

Ang lain pang mga mananaog sa Baybay race mao sila si Brian Cas Caisyon sa open enduro race  uban nilang Elfie Ayco ug JR Lim nga nitapos sa ikaduha ug ikatulong dapit.

Sa laing bahin, si Winston Apluan maoy nanghawod sa beginners, gisundan ni Andon Capusyon sa ikaduha ug Medam Ayco alang sa ikatulo nga dapit.

Sila si  kanhi Shell-Yamaha coach nga si Dodong Galia ug Joel Pilapil maoy nitukod sa maong kalihukan uban sa abag sa local government unit sa Baybay, Leyte, Castrol Lubricants ug Coca-Cola.