Guardo nangayo'g pasaylo

Nangayo og pasaylo si Arthro Kontra Arthritis basketball team owner Jonathan 'Atan'  L. Guardo kagahapon tungod sa gipakita sa iyang assistant coach nga si Jojo Lozano, kinsa gikatahong nanapog og referee atol sa  88-93 nga kaparotan sa Arthro batok sa Holcim-Moneygram MisOr atol sa ilang do-or-die final match sa  1st MVBA Christmas Cup  niadtong Miyerkules sa gabii  didto sa Cebu Coliseum.

"I condemned what Jojo Lozano did the other day. I take apology for what happened,"matud pang Guardo sa iyang text message.  “I already tasked Jerry Guardo to conduct internal investigation. I promise it won’t happen again,” dugang pang Guardo, kinsa atua karon sa Estados Unidos.

Sa iyang reklamo, basi sa blotter sa Carbon Police Station, si international referee Raleigh Relator nipasangil ni Lozano nga maoy nihampak sa iyang tangkugo samtang siya naghubo sa iyang sapatos sa ilang dug-out, hinungdan sa iyang pagkahagba og nakuyapan.

Si Relator nipasangil usab ni Lozano, kinsa  nibahad kaniya nga ipa-salvage dinhi sa Cebu. Si Relator tua nanimuyo sa Roxas City, Capiz ug 14 na ka tuig sa iyang propesyon.

Gipaabot karon nga mopasaka og tukmang kaso si Relator batok ni Lozano.

Si Jerry Guardo nagkanayon nga si Lozano manubag gyud sa iyang nahimong kalapasan hinuon ang Arthro organization mohimo pa og pormal nga imbistigasyon aron pagkuha sa habig ni Lozano.