Wala pa gani dangti og semana, gipakita sa M. Lhuillier Kwarta Padala-Cebu City kung kinsay tinuod hari sa basketball court dihang ilang gipukan ang Holcim Pryce Pharma-Mis Or. kagabii sa iskor 101-94 atol sa kampiyonato sa 1st Mindanao Visayas Basketball Association (MVBA) Christmas Cup didto sa Cebu Coliseum.
Nagpungasi nga puntos ang gibuhi-an nilang Gerry Cavan ug Bruce Dacia sa fourth quarter aron pakgangon ang rally sa Mis. Or ug bisan pa man og sige lang sikit ang nauwahi, wala’y pagkutat ang pagpabuhaya nilang krusyal nga puntos aron santa-on ang dautang laraw sa Mis. Or sa paglabni sa korona sa balwarte sa Jewelers.
Permanente gyud mosuway og sikit ang Mis. Or apan kanunay usab nagkontrolar ang Jewelers apan dili hinuon kaayo layo og distansya. Samtang nagpa-uwan og puntos ang mga sinaligan sa Jewelers, mosukli usab og tirada sa three-point area ang Mis. Or. ug diha pa makaginhawa og luag-luag si coach Yayoy Alcoseba sa kataposang minuto kay medyo hayag-hayag na man ang pagsakmit sa korona.
Mao kadto’y ikaduhang korona nga nasakmit sa Jewelers gawas sa MVBA regular season nga bag-ohay pa lang natapos diha usab sa Cebu Coliseum.
Nagtutok na ang Jewelers sa kadaugan sa kataposang 27 segundos ug aduna sila’y labaw nga siyam ka puntos, 97-88 apan gipakuratan sila ni Ramil Tagusa kinsa mitira og duha ka tres ug mihana na usab og duol ang Mis. Or sa iskor, 94-99 apan daginoton nalang ang oras.
Mipasulod si Stephen Padilla og insurance baskets gikan sa free throw aron sa pagtapos sa duwa sa iskor, 101-94 may 9.8 na lang ang nahibiling oras.
Maayong pagka-katag ang iskor sa Jewelers kinsa gipangulohan nilang Bruce Dacia ug Woodrow Enriquez nga parehong mipusa og tag 16 puntos samtang si Padilla mibahug og 15 puntos ug 14 puntos usab gikan kang Ron Capati.
Laing naka double figures sa Jewelers mao sila si Cavan ug Marlon Baco nga may 11 puntos.
Gawas sa maanindot nga trophy nga mihulagway sa dakung kopa, mibulsa usab ang Jewelers og ganti nga 100 thousand cash samtang ang Mis. Or nakadawat og salaping 50 mil ug ang Spring Oil kinsa maoy ikatulong pwesto may 30 mil.
Ang Mis. Or gipangulohan ni Tagupa sa iyang 24 puntos samtang ang Sugboanong si Lowell Briones mitampo og 22 puntos.
Puntos kada usa:
M. Lhuillier (101) — Dacia 16, Enriquez 16, Padilla 15, Capati 14, Cavan 11, Basco 11, Aying 8, Bat-og 5, Gatumbato 3, Latonio 2.
Holcim-Mis. Or (94) — Tagupa 24, Briones 22, Sanchez 16, Nailon 15, Sevilla 6, Apepe 5, Moreño 4, Jabagat 2.