Tinguha sa M. Lhuillier Kwarta Padala-Cebu City Jewelers nga tapuson ang ilang kampanya sa tuig 2007 pinaagi sa pagkulit sa ilang ikaduhang sunod-sunod nga titulo sa 1st Mindanao Visayas Basketball Association (MVBA) Christmas Cup karong adlawa diha sa Cebu Coliseum.
Ang duwa gitakda sa alas-7:00 sa gabii human sa duwa alang sa ikatulong dapit nga sugdan sa alas-5:30 sa hapon.
Ang Jewelers ni Michel Lhuillier ug coach Raul 'Yayoy' Alcoseba makigtige alang sa kampiyonato ning upat ka adlaw nga torneyo batok sa modaog sa laing semifinal match tali sa Arthro Kontra Arthritis ug Holcim Pryce Pharma-MisOr Moneygram nga padayon pang nagduwa sa pagsulat niini kagabii diha gihapon sa Cebu Coliseum.
Ang mapilde sa duwa sa Arthro ug MisOr maoy moharong sa Malabon-Spring Cooking Oil alang sa ikatulong puwesto. Ang Malabon-Spring mipukan sa Zamboanga City Latinos kagabii sa iskor nga 88-80.
Ang Latinos milabaw og dos puntos, 47-45 pinaagi sa back-to-back baskets ni Orlando Daroya sa tunga-tungang bahin sa third quarter. Apan ang Malabon-Spring mibawos pinaagi sa paglusad og 13-0 run aron pag-ilog sa labaw, 58-47.
Miaksiyon og gukod ang Zamboanga Latinos, apan napakyas kini gumikan kay mikiat man si Nani Epondulan sa katapusang 6:13 sa duwa. Si Epondulan maoy nangulo sa Malabon-Spring sa iyang 25 puntos gisundan ni Mario Reyes nga miabuno og 16 puntos. Sila si Dondon Villamin ug Danny Capobres milansang og 11 puntos matag usa.
Si Daroya maoy nangulo sa Latinos nga mbugha og 20 puntos.
Puntos Matag Usa
Malabon-Spring (88) – Epondulan 25, Reyes 16, Villamin 11, Capobres 11, De Castro 8, Yambao 6, Guiyab 4, Balneg 3, Cuenca 2, Tasonera 2
Zamboanga (80) – Daroya 20, Navarro 15, Saracho 14, Briones 10, Ramirez 7, Sebastian 7, Alvarez 5, Padrigao 4.