Fajardo nagmangtas sa UC/Aspac Bank

Nagmangtas na sab ang higanteng si Jun Mar Fajardo aron pangulohan ang UC/Aspac Bank sa ilang 100-90 nga kadaugan batok sa DBTC/Unilab-Alaxan sa Reinforced Partners Cup niadtong Huwebes sa gabii sa Cebu Coliseum.

Mihulga pag-apas ang DBTC kinsa nabiyaan na unta og 26 puntos sa halftime, 60-34 gumikan kay mipahuway si Fajardo sa third period. Niadtong higayona nga wala nay makababag nila sa ilawom, gipahimuslan usab dayon sa DBTC ang panahon ug paspas kaayong miratsada ug nakan-an ang labaw sa iskor 67-74 paghuman sa third period.

Aron maluwas sa peligro, gipasulod og balik ni coach Gomez si Fajardo uban ang kinakusgan nilang starting unit nga naglakip nilang Miguelito Ducay, Allen Abellanosa, Jared Kane Abatayo ug Kelvin Juliane ug wala nay nahimo pang milagro ang DBT.

Si Fajardo milansang og 30 puntos alang sa UC/Aspac Bank, si Abellanosa mitampo og 16 puntos ug si Janssen Abella nga miamot og 14 puntos.

Ang UC/Aspac Bank nagbitbit na og 2-0 win-loss nga baraha  nga nagsunod sa USJR/Bibbo Hotdog nga  temporaryong nag-una sa liderato pinaagi sa ilang 3-0 nga baraha.

Si Ricmar Perturbos maoy nangu sa DBTC sa iyang 18 puntos ug giabagan  kini nilang Mar Jun Apura, Celso Colegado ug Lester Sunga.