MLSDF Awards Night karong Disyembre 20

Ang M. Lhuillier Sports Development Foundation mopahigayon og Awards Night karong Disyembre 20 aron pasidunggan kadtong outstanding individuals ug institutions nga nakahimo og walay hunong nga pagsuporta sa laing dakung kalampusan sa MLSDF.

"This is our own way of letting them know how appreciative we are for their unwavering support to the programs and projects of MLSDF. Indeed, it has been another fruitful year for us. We're looking forward to the coming year full of zest and enthusiasm,"  matud pa ni MLSDF executive director Eddie Ybañez.

Ang makadawat og plaques of appreciation gikan sa MLSDF mao ang University of San Carlos (USC), University of  San Jose-Recoletos (USJ-R), University of Southern Philippines Foundation, University of the Visayas (UV), Southwestern University (SWU), Consolacion National High School ug Salazar Colleges of Science and Institute of Technology.

Gitakda sab nga pasidunggan mao ang MLSDF All-Stars tungod sa ilang pagdaog sa Maasin City Invitational Volleyball Tournament, ang USJ-R women's volleyball team nga mipahiluna sa ikaupat nga dapit sa 2007 National University Games didto sa Bacolod City ug sila si Jusabelle Brillo ug Janez Armie Igot sa UV human nila gidominar ang Nestea Beach Volley Season II niadtong Abril didto sa Boracay Island.

Makigsawo nila sa podium ang MLSDF batters sa ilang pagpanghawod sa M. Lhuillier Kwarta Padala Invitational Softball Championships ug sa ALA Boxing Gym amateur boxers nga gipangulohan ni coach Peter Cuizon nga wala sab magpabitin sa mga torneyo nga ilang giapilan ubos sa sponsorship sa MLSDF.

Ning tuiga, ang MLSDF nakapasiugda og ubay-ubay nga mga kompetisyon nga gisugdan sa 1st M. Lhuillier Kwarta Padala All-Ladies Beach Volleyball Invitational, 1st MLKP Development Volleyball League for Boys and Girls, 1st MLKP Men and Women's Volleyball Open, 3rd MLKP Softball Tournament ug ang 4th MLKP Under-21 Developmental Basketball League.

Ang MLSDF nahimo sab nga major corporate sponsor sa Team Mandaue nga nagpabiling way pilde sa tulo ka duwa sa 3rd Governor Gwen Garcia Unity Volleyball (GUV) Cup.