M. Lhuillier misakmit sa Visayas Division title

Wala na hatagi pa og kahigayonan sa M. Lhuillier Kwarta Padala-Cebu City nga makabawi ang Cebu Landmaster-Mandaue human kini miposte og 73-65 nga kadaugan sa Game-2 aron pagsakmit sa Visayas Division title sa 2007 Mindanao Visayas Basketball Association (MVBA) Second Conference niadtong Biyernes sa gabii didto sa Mandaue City Cultural and Sports Complex.

Gumikan niini, pormal nga gitak-op sa Jewelers ang best-of-three series sa baraha nga 2-0. Midaog sila sa Game 1 sud sa overtime, 89-86 niadtong Miyerkules didto sa Cebu Coliseum.

Ang best-of-three MVBA Finals tali sa M. Lhuillier ug Mindanao Division champion Holcim Pryce Pharma-MisOr ni Gov. Oscar Moreno ug coach Bong Abad subhan karong Miyerkules sa alas-6:00 sa hapon  didto sa Xavier University Gym sa Cagayan de Oro City.

Inspirado sa presensiya nilang team owner Joe Soberano ug Mayor Jonas Cortes, ang Landmaster ni coach Jun Tan mipabuhagay og nagkayong opensiba pagsugod sa duwa diin si Bong Marata mitali og 14 sa nag-una nilang 16 puntos nga maoy nakahatag kanila og 16-12 nga labaw.

Apan sa kalit lamang na-injury si Marata ug wala na kini makabalik og duwa. Gumikan niini, gipahimuslan sa M. Lhuillier ang kahigayonan aron pagtabla sa iskor nga 22-22.

Katapusang nakalabaw ang Landmaster sa iskor nga 31-30 gumikan kay si Bruce Dacia mipasiugda og mainiton nga rally aron pagpalabaw sa Jewelers, 38-31.

Sila si Ronald Capati, Stephen Padilla ug Woodrow Enriquez mikiat sab dayon aron paghatag sa M. Lhuillier sa kinadak-an niining labaw nga 16 puntos, 57-39 sa naghinapos nga bahin sa ikatulong kuwarter ug sukad niadto wala na makaugpo pa ang Landmaster.

 Si Dacia maoy nangu sa M. Lhuillier sa iyang 18 puntos ug siya sab ang gikoronahan isip Visayas MVP gumikan kay mi-average man siya og team-best 13.8 puntos matag duwa.