'Shockwave' motay-og karon sa Cebu Coliseum

Masaksihan karon  sa mga Sugbuanon ang  talagsaon ug kulbahinam nga Mixed Martial Arts and Kickboxing fight sa ikaupat nga hut-ong sa Yaw-Yan ArDigma Martial Arts Federation's Ground and Pound nga ulohan og "Shockwave" nga sugdan karong  alas-7:00 sa gabii diha sa Cebu Coliseum.

"Just like in my previous fights, I'll try to stop him in the first round," pahimangno ni Alcer 'D Master of Disaster' Lozada ngadto sa iyang Sugbuanong kaatbang nga si Ryan 'The Real Deal' Solana.

Si Lozada, ang undefeated fighter gikan sa Mindanao Top Team sa Butuan City moharong ni Solana sa Yaw-Yan Musang sa Lapu-Lapu City sa main event sa Mixed Martial Arts sa tulo ka hugna nga kumbati sa   70-kilogram division.

Lain pang Cebuano fighter nga angayang tan-awon mao ang away ni Engie 'The Destroyer' Piloto, ang garbo sa Yaw-Yan ArDigma Cebu nga makigtigi ni Leo 'Thunder' Filisan sa Mindanao Unified Martial Arts sa Cagayan de Oro City.

Sa laing MMA  showdown, si Maxlito 'Hyper' Eagle' Yong sa Yaw-Yan Musang makigsangka ni Eugene 'The Brawler' Yunque sa Bacolod Fight Club, Cesar 'Alamid' Yap makigbinakbakay ni Erwin 'The Bomber Man' Neri sa FKR Philippines Cagayan de Oro  ug Elmer 'D Hammer' Jandayan sa Bohol Sagravate Pit Fighting Society nga makigtigi ni Alan 'D Game Plan' Atup sa Butuan.

Ang ubang mga away naglakip nilang Jovito 'Young Hercules' Abellana sa Calma Stable vs. Charlie Belle 'The Steelman' Castro, Vicvic  'The Jet' Gesta batok Steve 'The Wild' Sevilleno, Eric 'Baki' Areglado sa C-Max Mix sa Lapu-Lapu City batok Greg 'Anaconda' Gesta, Dondon Gesta sa C-Mac Kickboxing Club batok Randy 'The Grappler' Morres ug Raffy 'The Hawk' Tuñacao sa Soma KC batok Steven 'The Muma Boy' Lagbas.

Sa kickboxing event, si James 'Bisayas' Dabon sa Yaw-Yan ArDigma Cebu makigsangka ni Freddierick 'Jehovah Nissi' Amparado alang sa main event.

Sa undercards, si Argel 'The Phantom' Oppus sa Arcomjukai KC sa Mandaue moharong ni Dexter 'Buakaw' Melon sa Dumaguete Muay Thai, si Jimuel 'The Conqueror' Naigie sa Arcomjukai makigsakbang ni Marjun 'The Muma Warrior' Poriento ug Nicanor 'The Energizer' Leonardo sa Black Scorpion KC sa Talisay City makigsangka ni Leo 'The Golden Boy' Gearlan sa Yaw-Yan Musang.

Mosubak sa maong kalihukan mao ang special attraction sa women's category diin nakalinya ang grudge rematch tali nilang Nova 'The Heartbreaker' Dinolan  sa ATC Kickboxing Club sa Mandaue ug Alchiene 'Lady' Yosores sa Mindanao Unified Martial Arts.

Ang mga tiket mapalit sa tag-P50 alang sa general admission, P100 sa upper box, P150 sa lower box, P300 sa ringside ug P1,000 alang sa VIP.

Alang sa dugang kasayoran ug ticket reservations, tawag lang sa (032) 255-0356, (032) 255-8919 ug (032) 255-1405.