Tulo ka Sugbuanon ang mipalandong sa final sa ilang tagsa-tagsa ka kategoriya sa Perlis Age-Group Tennis Championship kagahapon didto sa Perlis, Malaysia.
Si Em-Em Siso, ang bugtong Sugbuanon nga wala pa makatilaw og pilde ning maong torneyo, yano kaayong milansang og daog batok ni Kim Kyug sa Korea, 6-0, 6-1 aron pag-angkon og luna sa finals sa girls' 14-under division.
Iyang harungon sa ikatulong higayon si Theviya Selvarajoo karong adlawa.
Kahinumduman, si Selvarajoo mao usab ang partner ni Em-Em sa doubles event.
Miabante sab sa finals sa boys' 14-under category ang maguwang ni Em-Em nga si Niño human sa iyang 6-1, 6-3 nga kadaugan batok ni Tan EE Zhou. Hinuon, si Niño napilde sa quarterfinals sa doubles competition.
Sa laing bahin, si Krissianne Kintanar moduwa sab sa finals sa girls' 12-under division batok ni Kim Dave human mihakot og daog batok ni Deli Zaverne Kaur, 6-1, 6-4 sa semis.
Paninguhaon nilang Em-em ug Kintanar nga moangkon og lingkoranan sa doubles final sa ilang tagsa-tagsa ka kategoriya human makasulod sa semifinals kagahapon.
Nahanaw ang pangandoy ni Niño nga mohakot og bulawan sa doubles sa boys' 14-under category human mapilde sa quarterfinals.