Nakaginhawa pa ang MP Warriors-GenSan ug mihatod sa serye ngadto sa tinaktakay nga Game-3 sa Mindanao Division Finals sa 2007 Mindanao Visayas Basketball Association (MVBA) Second Conference human gilubong ang Holcim Pryce Pharma-MisOr sa iskor nga 81-62 niadtong Domingo sa gabii didto sa Almendras Gym sa Davao City.
Ang Game-3 adto gihapon duwaon sa Almendras Gym.
Ang modaog maoy moabante sa MVBA Finals batok sa Visayas Division champion nga gikatakdang sugdan karong Disyembre 8.
Ning pagsulat, ang Game-3 sa Visayas semifinals tali sa Cebu Landmaster-Mandaue ug Arthro Kontra Arthritis padayon pa nga nagduwa kagabii didto sa Mandaue City Cultural and Sports Center.
Ang modaog sa maong duwa maoy moharong sa M. Lhuilier Kwarta Padala-Cebu sa Game-1 sa Visayas Divisions Finals karong adlawa diha sa Cebu Coliseum.
Grabe ang depensa nga gipatuman sa Warriors ni boxing superstar Manny Pacquiao ug coach Ramon Pido diin hapit wala pa-iskora ang MisOr ni league chairman Gov. Oscar Moreno sa katapusang singko minutos sa duwa.
Mibanat dayon ang Warriors pagsugod sa duwa diin miposte kini og 13 puntos nga labaw luyo sa paningkamot nilang Rolly Menor, Apol Coronado ug Tadena. Bisan pa niini, ang MisOr nakahimo gihapon pagkitkit sa labaw diin miabot na lang kini og uno punto, 35-36 human masulod ang tres ni Nat Cruz sa first half.
Nakalabaw pa ang MisOr dihang mibuhi og tres si Anton Villoria sa sayong bahin sa third quarter sa iskor nga 40-39, apan ang Warriors miilog og balik sa labaw pinaagi sa paningkamot ni Jethrone Recustodio. Gikan niadto nagmabinantayon na ang Warriors ug namentinar nila ang ilang labaw.
Si Menor maoy nangulo sa Warriors nga misansan og 23 puntos, gisundan ni Tadena mibugwal og 14 puntos. Ang duha pulos miposte og conference-highs. Si Coronado miamot og 12 ug si Recustodio mihirit og 11 puntos.
Si Cruz mao usab ang nangulo sa MisOr nga mibugha og 15 puntos, samtang si Villoria, kinsa mao ra ang ikaduhang player nga nakakuha og double-digits miratsada og 12 puntos.