Tinimbangay sa ‘Payback’

PASAY CITY –  Mag-abot na sab  karong adlawa ang tanang boksidor nga apil sa baraha sa "PAYBACK: Resbak Para sa Kababayan" triple championship boxing promotion  alang sa weigh-in  didto sa Gateway Mall sa Cubao, Quezon City.

Si WBO vice president for Asia-Pacific Leon Panoncillo ug mga kadagkoan sa Games and Amusements Board (GAB) nga gipangulohan ni chairman Eric Buhain mosaksi sa maong mahinungdanon nga kalihukan nga pagasugdan sa alas 10:00 sa buntag. 

 “This is going to be a spectacular show. Everybody is expecting a great fight especially between Bautista and Meza. We’re excited for the show to happen,” matud pa ni Panoncillo nga nahinabi sa Banat News.

Si ALA Stable star Rey 'Boom Boom'  Bautista (23-1, 17KOs) modepensa sa iyang WBO Intercontinental super bantamweight title batok sa gikalisangang  Mehikano nga si Antonio 'Barrio'  Meza (33-2, 19KOs) sa main event sa maong multi-million nga promosyon nga  gipasiugdahan sa Third Force Promotions karong Domingo didto sa Araneta Coliseum.

Mao kini ang pagbalik ni Bautista human sa makalisang niyang  kapildihan pinaagi sa first-round knockout ngadto ni WBO super bantamweight champion Daniel Ponce de Leon sa Boxing World Cup niadtong Agosto 11 didto sa Arco Arena sa Sacramento, California.

Sa supporting main event, lain pang garbo sa ALA Stable nga si AJ 'Bazooka' Banal (15-0-1, 12KOs) manalipod sab sa iyang trono isip WBO Youth super flyweight champion batok sa gikaintapan sab nga Mehikano nga  si Jovanny 'Bambino' Soto (25-7-1, 20KOs).

Sa lain pang title bout, ang wa pay pildeng boksidor sa ALA Stable nga si Milan Melindo (13-0, 4KOs) modepensa sa labing unang higayon sa iyang WBO Asia-Pacific minimumweight title batok ni Indonesian Jack Amisa (17-3, 13KOs).

"As far as my boys are concerned, they have no weight problems. They peaked just perfectly right for this Sunday’s big event," matud  pa ni ALA chief trainer Edito Villamor. Duna pay tulo ka mga pambato sa ALA Stable ang mopakita  sa ilang abilidad sa maong pinaksitay nga gilangkuban og upat ka nasud. Kini mao sila si RP bantamweight champion Michael Domingo, RP flyweight champion Rocky Fuentes ug ang bag-ong sulbong nga si Joseph Omanz. Si Domingo makigharong ni Tanzanian national champion Anthony Matias, si Fuentes makighamag ni Ritchie Mepranium, samtang si Omanz makigtige batok ni Albert Cesa.

Sa ubang mga kumbati, si Jason Pagara moharong ni Anton Olarte, si  Bai Elorde makigsangka ni Cris Dollosin ug si Marron Sanchez sa Omega Stable sa Cebu makigbugno ni Jesson Perater sa Mandaluyong.

Ang entirong "Payback" card ipasalida live sa ABC-5 sugod sa alas 9:00 sa buntag ug duna say live webcast sa tibuok kalibutan nga ipadangat sa netvision.com.