Taulava sa Coke na!

Sa pagdating ni Asi Taulava, inaasahang may dalang pag-asa ito upang makaahon ang Coca-Cola sa ilalim ng standings sa kasalukuyang Smart-PBA Philippine Cup.

Matapos ang walong taong pagsusuot ng Talk N Text jersey, magsusuot ngayon ng ibang uniporme sa kauna-unahang pagkakataon si Taulava na magdedebut para sa Coca-Cola ngayong hapon sa pakikipagharap ng Tigers sa Alaska sa Araneta Coliseum.

Kasalukuyang nangungulelat ang Tigers na may isang panalo pa lamang sa walong laro at malaking tulong sa kanila ang pagdating ni Taulava na nakuha ng Coke mula sa Phone Pals matapos ang kasunduan kamakalawa kapalit ni Ali Peek at ng 2008 first round pick.

Inaasahang pinaghandaan ng Alaska ang paglalaro ngayon ni Taulava upang makakalas sa pakikipagtabla sa Magnolia sa 5-4 record sa likod ng nangungunang Purefoods TJ Giants na may 9-1 record at pumapangalawang Red Bull na may 6-3 kartada.

Sa ikalawang laro, maghihiwalay naman ng landas ang defending champion Barangay Ginebra at ang Welcoat na tabla sa 3-6 record sa alas-7:20 ng gabing sagupaan.