Chiefs tinguha moposte og 3-0

Paglig-on sa ilang liderato maoy gitinguha sa   Lapu-Lapu Chiefs  sa ilang pakigsangka batok sa host Talisay Aquastars karong gabii pagpadayon sa 1st Inter City Cup Basketball Challenge didto sa Talisay gym.

Sa dakbayan sa Danao, mopakita sa labing una nilang aksiyon ang Danao Pistols sa ilang pag-host batok sa Bogo Bogoys didto sa   Danao City Auditorium.

Ang Chiefs nagkupot karon og  2-0 nga baraha ug ilang paninguhaon nga  mainat nila ang ilang baraha  ngadto   sa 3-0 karong gabii.

Midaog ang Chiefs  atol sa ilang duwa batok sa host Bogo sa iskor nga  73-68  niadtong Nobiyembre 17 ug napun-an ang ilang daog human nila  gipukan ang Toledo Dream Team sa iskor nga  82-79  niadtong Nobiyembre 19.

Bisan pa man tuod sa ilang taas nga moral, dili angay mokompiyansa ang Chiefs kay dili sayon pildehon ang Aquastars.

Gani hapit man maka-upset ang Aquastars batok sa Cebu City Niños atol sa pagbukas sa liga niadtong Nobiyembre 17 sa iskor nga 96-94.

Hapit sab gani mapilde ang Chiefs didto mismo

sa ilang korte apan wala lang makasustenir ang Toledo.

Mga sinaligan sa Chiefs naglakip  nila ni Adonis Morata, Orly Amores, Mike Asoro, Ritchel Falcon, Dennis Pajares ug Rino Berido.

Sa habig sa Aquastars, ang ilang saligan mao  si Rico Tabar.

Sa laing bahin, ang Pistols magsalig ni Bryan Belicarion, samtang ang Bogoys magsalig nilang Jun Ace Ursal ug Noel Balili.