Team Pacman mitumba sa Club Monday
Ang Team Pacman ni boxing superstar Manny 'Pacman' Pacquiao nagsalig sa mabayanihong duwa ni Jingjing Rama, kinsa nagpaturagas og patuasik sa iyang mga puntos nga maoy responsable pagpalukapa sa Club Monday sa iskor nga 87-72 sa nagpadayong aksiyon sa 1st MP Cup Invitational basketball tournament didto sa City Sports Club-Cebu gym sa Cebu Business Park.
Sa labing unang higayon sa lima ka mga duwa, si Rama maoy bida ug nahimong leading scorer sa Team Pacman nga mibugha og 17 puntos ug miariya og lima ka 3-pointers, tulo niini iyang napugnit sa katapusang lima ka minutos sa duwa aron pagpahamtang og 15 puntos nga lubong sa Club Monday.
Ang Team Pacman nabiyaan og singko puntos human sa unang kuwarter, 20-25, apan nag-wild kini sama sa mangtas nga toro sa sunod nga duha ka kuwarter aron pag-ilog sa labaw, 63-57 sa katapusang 10 minutos sa maong duwa.
Giabagan sab og maayo si Rama nilang Buchoy Pumareja, kinsa mikandos og 15 puntos, samtang sila si Noel Talas ug Joel Gallego nagkumboya og 27 puntos alang sa Team Pacman, kinsa mihipos og 4-1 win-loss nga rekord.
Si Ondon Garcia milansang og 16 puntos, gisundan ni Jonas Jumalon nga mipupo og 15 puntos alang sa Club Monday nga napilit ug wala na makatilaw og daog human sa tulo ka duwa.
Sa laing aksiyon, ang Casino Filipino-Mactan miposte og 66-59 nga kadaugan batok sa Cebu Dental Society (CDS).
Si Eric Relampagos maoy nangulo sa Casino Filipino-Mactan sa iyang 16 puntos, samtang sila si Kenneth Floro ug Ricky Tamarra nagkumboya og 24 puntos aron pagkulit sa ilang ikaduhang daog sud sa
Ang tinamay nga CDC nakaangkon sa ilang ikaupat ka sunod-sunod nga kapildihan sa pipila na ka mga duwa.
- Latest
- Trending
