Cebu Landmaster nakalingkawas

Naluwas sa delikadong kahimtang ang Cebu Landmaster-Mandaue human kini makaipsot gikan sa kulbahinam nga duwa pinaagi sa pagpukan sa Holcim Pryce Pharma-MisOr sa iskor nga  81-77 sa nagpadayong aksiyon sa 2007 Mindanao Visayas Basketball Association (MVBA) Second Conference niadtong Miyerkules sa gabii didto sa Mandaue City Cultural and Sports Complex.

Ang Cebu Landmaster maoy nidominar sa tibuok duwa apan nahulga kini sa nanghinapos nga bahin sa duwa dihang si Mark Moreño sa MisOr mitusak og 3-point  shot aron pagsikit sa  iskor, 78-77.

Si Michael Mañigo mipasud og duha ka free throws human makakuha og foul gikan ni Mark Abadia aron paghatag og tres puntos nga bentaha sa Cebu Landmaster sa iskor nga 80-77 sa katapusang 11 segundos sa duwa.

Mapadaog unta ni Dennis Concha ang MisOr ugaling lang wala masulod ang gibuhian niyang three-point shot ug ang bola napunta ni Mark Yee, kinsa daling gi-foul ni Nathaniel Cruz. Si Yee mipasud og usa ka free throw nga maoy mikandado sa maong duwa.

Sa maong kadaugan, ang Cebu Landmaster ni Mandaue Mayor Jonas Cortes ug Joe Soberano nagtabla na uban sa M. Lhuillier Kwarta Padala-Cebu nga adunay  managsamang 8-2 win-loss record.

Hinuon, ang M. Lhuillier ni Michel Lhuillier ug coach Raul 'Yayoy' Alcoseba maoy nakaangkon sa  tiebreaker ug maoy  nagbalhog sa Landmaster ngadto sa Wild Card round uban sa Arthro Kontra Arthritis-Cebu ni sports patron Jonathan 'Atan' Guardo ug coach Al Solis.

Ang MisOr ni league chairman Gov. Oscar Moreno natagak sa 2-5 win-loss record nga nagduso sa MP Warriors-GenSan ngadto sa kinatas-ang dapit sa standings sa Mindanao Division.

Ang MP Warriors ni boxing superstar Manny 'Pacman' Pacquiao nagbitbit og 2-4  win-loss nga baraha.

Ang playoffs sa maong liga ubos sa pagtugot sa Samahang Basketbol ng Pilipinas (BAPSBP) sugdan sa ikatulong semana  ning bulana.

Si Christian Nicdao mi-iskor og otso sa iyang game-high 16 puntos sa final quarter aron sa pagpangulo sa Cebu Landmaster, gisundan ni Bong Marata kinsa miani og 13 puntos, samtang si Moreño mao usab ang nangulo sa bisitang MisOr nga mihipos og 14 puntos lakip na ang upat ka triples.

Sa laing bahin, ang Arthro mosugod na sa ilang tulo ka duwa sa Mindanao tour karong adlawa diin  ilang sulngon ang Goldstar Hardware-backed Duterte Agilas-Davao didto sa Almendras Gym.  Ang duwa sugdan sa alas-6:00 sa gabii.

Mangulo sa kampanya sa Arthro mao sila si Alex Cainglet, Mark Ababon, Doroteo Almacin ug ang 6-foot-7 nga si Rino Berame.

Ang Agilas nga modepensa sa ilang teritoryo pangulohan nilang Wynsjohn Te, Bob Cozy Ilanga, Jonjon Gonzaga, Greggy Delica ug Boboy Berami.