ML Kwarta Padala milansang og daog

Ang M. Lhuillier Kwarta Padala-Cebu City mikulit  og labing maayong rekord sa classification round sa 2007 Mindanao Visayas Basketball Association (MVBA) Second Conference human midaog batok sa Holcim Pryce Pharma-MisOr sa iskor nga 74-69 niadtong Martes sa gabii didto sa Cebu Coliseum.

Mao kini ang ikaupat nga higayon sa pipila na ka mga komperensiya nga ang Jewelers  nilang Michel Lhuillier ug coach Raul 'Yayoy' Alcoseba nag-una sa league standings.

Ang Lhuillier miposte  sa ilang ikawalo nga daog sa 10 ka duwa ug nakabentaha kini og usa ka daog sa Cebu Landmaster nga padayong nagkumbati  batok  sa MisOr sa pagsulat niini kagabii.

Bisan pa'g modaog ang Cebu  Landmaster-Mandaue  ni  Mayor Jonas Cortes, Joe Soberano ug coach Jun Tan, dili gihapon matarog  ang  Jewelers sa ilang nahimutangan.

Ang MisOr ni league chairman Gov. Oscar Moreno ug coach Bong Abad makapila ka higayon nga makatabla sa maong duwa ug ang katapusan sa iskor nga 65-65 human sa drive ni Ramil Tagupa sa katapusang 3:08 sa duwa.

Gikan didto, ang M. Lhuillier mipatuman sa ilang hugot  nga depensa ug wala nila papuntosa ang MisOr samtang ang Jewelers milansang og lima ka sunod-sunod nga free throws aron pag-inat sa labaw, 70-65.

Mibingat og maayo ang labaw sa Jewelers ngadto sa siyete puntos, 72-65  dihang nasulod ang easy lay-up ni Ron Capati sa nahabiling 1:49 sa duwa.

Kinadak-ang labaw nga natilawan sa ML Jewelers sa iskor nga 35-25 sa halftime pinaagi sa paningkamot nilang Bruce Dacia, Marlon Basco ug Capati.

Ang kombinasyon nilang Tagupa, Frank Nailon ug Randy Sevilla maoy nakapugong sa pagpanginit sa  batos sa ML Jewelers.

Ang MisOr nakatabla sa makaupat ka higayon, samtang milaslas sa labaw sa ML Jewelers ngadto sa single digit makaupat usab ka higayon.

Si Basco maoy nangulo sa ML Jewelers sa iyang 16 puntos uban ang walo ka rebounds, gisundan nilang Capati ug Dacia nga miabuno og 13 puntos matag usa.

Si Tagupa, kinsa milansang og conference-high nga 16 puntos uban ang unom ka rebounds maoy nangulo sa nanulong nga MisOr. Si Nailon mitampo og 14 puntos ug si Sevilla miamot og 13 alang sa MisOr nga nag-una karon sa Mindanao  Division uban sa MP Warriors-GenSan sa managsamang  2-4 win-loss nga baraha ning maong liga nga gipaluyohan sa Samahang Basketbol ng Pilipinas (BAP-SBP) uban sa suporta sa ML Kwarta Padala, Nature's Spring,  Sulpicio Lines, Cokaliong Shipping, Accel, Reva Sandals, Gameface.Ph ug Nike Basketball.

Sa laing bahin, ang Arthro Kontra Arthritis-Cebu mosugod sa ilang Mindanao tour ugma diin ilang sulngon ang Goldstar Hardware-sponsored Duterte Agilas-Davao sa alas-6:00 sa gabii didto sa Almendras Gym.