MisOr sugamak sa Arthro
Nairog na ang daog sa Arthro Kontra Arthritis-Cebu human nila birahi ang Holcim Pryce Pharma-MisOr sa iskor nga 83-70 sa pagbalik sa 2007 Mindanao Visayas Basketball Association (MVBA) Second Conference niadtong Lunes sa gabii didto sa Cebu Coliseum.
Si Rino Berame mi-iskor og sayes sa nahabiling 1:30 sa duwa aron pagselyado sa kadaugan sa Arthro ni sportsman Jonathan 'Atan' Guardo ug coach Al Solis alang sa ilang ikatulong daog sud sa pito ka duwa.
Ang MisOr mihulga sa Arthro pinaagi sa paglaslas sa iskor 69-75, apan nakawang ang ilang paningkamot gumikan ang higanteng si Berame mipasud sa iyang basket sa undergoal gikan sa blind pass ni Ronald Bucao. Si Berame midugang og duha ka free throws ug laing dos puntos aron pag-inat sa labaw ngadto sa 12 puntos sa iskor nga 81-69 sa nanghinapos nga bahin sa duwa.
Ang dunk ni Michael Luga dayong serbato sa buzzer maoy mikandado sa kadaugan sa Arthro.
Ang MisOr nakabentaha og dos puntos, 21-19 paghuman sa unang kuwarter. Tungod sa kahugot sa depensa nga gipatuman sa Arthro ang MisOr nakamugna og 10 turnovers sa ikaduhang kuwarter nga miresulta sa ilang pagkalubong og 13 puntos sa iskor nga 39-26 sa nanghinapos nga bahin sa maong kuwarter.
Bisan pa niini, ang bisitang MisOr ni coach Bong Abad wala mawad-i og paglaum ug gipasud si Rocky Sanchez gikan sa bench ug mipabuhagay sa iyang abilidad nga maoy nakapadasig sa nagluya niyang kaubanan. Si Sanchez nakig-alayon nilang Randy Sevilla ug Lowell Briones sa 8-0 run nga nakapakunhod sa labaw sa Arthro.
Si Berame mitapos og 12 puntos ug milangkat og pito ka rebounds. Gisundan ni Doroteo Almacin nga adunay 11 puntos diin siyam niini iyang nakuha sa first half. Sila si Luga, Mark Ababon ug Luther Luke Justiniani miabuno og 10 puntos matag
Samtang ang nangulo sa pilderong MisOr mao si Sanchez nga mibugha og 14 puntos, gisundan ni Sevilla sa iyang 13 puntos.
- Latest
- Trending
