Marquez dili imprisibo

Wala makadani ni Filipino boxing hero Manny  Pacquiao ang naangkong kadaugan ni reigning  WBC super featherweight  champion  Juan Manuel Marquez  pinaagi sa 12th round decision batok ni Rocky Juarez kagahapon didto sa Desert Diamond Casino sa Tucson, Arizona.

Si Pacquiao mitan-aw sa away nga gipasalida sa higanteng broadcast network ABS-CBN Channel 2 nga gidumala sa beteranong boxing commentator  Sev Sarmenta ug sa naila na kaayong boxing lady Dyan Castillejo uban ni IBF/IBO flyweight champion  Nonito 'The Filipino Flash' Donaire isip special guest analyst sa studio.

Matud ni Pacquiao nga "not  impressive" si  Marquez. 

Sumala  pa  ni  Pacquiao nga  huyang  ug  walay  igong   kusog si Marquez nga makatarog kaniya  ug gani daku ang  iyang  pagtuo nga modaog siya  kun adunay mahitabong  rematch. "Kayang kaya ko," pasalig ni Pacquiao.

Si Pacquiao ug ang iyang handlers wala pa mopakanaog og desisyon kun kinsa ang sunod niya  nga kaatbang. Magdepende lang kini kun kinsa  nga away ang makahatag kaniya og dakung kita. Hinuon ang consensus sa mga fight fans ug ingon man si WBC president  Jose Sulaiman ug Golden Boy Promotions Oscar de la Hoya mao ang pagsemento sa iyang legacy isip usa sa mga all-time greats. Si Pacquiao kinahanglan mopukan ni Marquez gumikan kay aduna pa silay butang nga  wala pa matiwas ug angay'ng hingpiton.

Kini tungod kay si Pacquiao bisan mipakamang  ni Marquez makatulo ka higayon sa una nilang engkuwentro sa featherweight  niadtong Mayo 2004, ang  Mehikanong boksidor nakahimo pa sa pagtabla sa maong away.