Carreon mangulo  sa GCSOC squad

Si Neilben ‘Tata’ Carreon maoy mangulo sa Greater Cebu Sports Organizing Committee (GCSOC) squad  sa 7th Lopue’s Table Tennis Association (LOPTTA) National Invitational Table Tennis Championship karong Nobiyembre 9-11 didto sa LOPTTA Table Tennis Center sa Lopue’s San Sebastian Annex building sa Bacolod City.

Si Carreon maoy motimbaya human kini mipakita og impresibong duwa sa 2007 Erne Jawad Cup diin siya nidaog sa open division title batok ni Michael Motel.

Ang Cebuano table tennis star nga si Carreon moduwa uban sa laing magduduwa gikan sa powerhouse team gikan sa University of Cebu (UC) lakip na niini ang managsuong Motel nga sila si Michael ug Mary Grace ug Glendo Nayre.

Si Jessica Jawad-Honoridez, kinsa maoy mo-coach sa maong team ning  tulo ka adlaw nga kompetisyon mosuway’g  ilog sa korona ug sa P25,000 nga ganting salapi.