Marquez batok Juarez

Paningkamotan ni Juan Manuel Marquez nga  iyang mapanalipdan ang World Boxing Council (WBC) superfeatherweight crown aron malamdagan ug matuman ang gitinguhang "rematch" batok ni Filipino boxing hero Manny 'Pacman' Pacquiao. 

Ang  Mehikanong si  Marquez manalipod  sa iyang korona  karong adlawa batok sa Amerikanong si Rocky Juarez didto sa Desert Diamond Casino sa Tucson, Arizona.

Ang 12-rounder  gitakda unta niadtong Septiyembre 15  didto sa Las Vegas apan tungod sa nahiagoman nga  right hand injury ni Marquez  giuswag ang maong away aron mahatagan og panahon ang  Mehikanong boksidor sa pagrekober.

“My hand is in incredible shape. I’m ready to go,”  matud ni Marquez. “I’m healed and I’m looking forward to the fight.”

Si Marquez nga adunay 47-3-1 win-loss-draw  diin 35 sa mga biktima pulos pinaagi  sa knockouts  mas  inilog  batok ni 2000  Olympic silver medalist Juarez, kinsa  adunay 27-3 win-loss uban ang  19 KOs.

Si Juarez nakasinati  na og duha ka daog sud ning tuiga ug matingohaon kining  mosakmit sa iyang ikatulong kadaugan sa iyang pakigsambunot  batok ni Marquez.

Gi-ablihan ni Juarez ang tuig 2007 pinaagi sa fifth-round TKO ni Emmanuel Lucero niadtong Pebrero, napun-an ang iyang daog pinaagi sa unanimous decision batok ni Jose Andres Hernandez niadtong Mayo.

“My dream is to become a champion and I’ll fight with all my power and strength to reach my goal,” matud ni Juarez. “It will show when I’m face to face against Marquez.”

Sa undercard bout sa International Boxing Federation featherweight title, ang Amerikanong si Robert Guerrero nga nagbitbit og 20-1-1 win-loss-draw ug 13 knockouts  makigsinukliay og kumo batok sa Mehikanong si Martin Honorio nga mikumpit og 23-3-1 win-loss-draw uban ang  12  knockouts.

Apan ang masentro sa card karong adlawa mao ang away ni Marquez, kinsa mipukan sa iyang kababayan nga si Marco Antonio Barrera niadtong Marso aron paglangkat sa korona.

Kun molampos si Marquez sa iyang title defense, posibleng adunay mahitabong rematch batok ni Pacquiao.  Ang Filipino  boxing hero nga si Pacquiao nipalukapa ni Marquez sa makatulo ka higayon sud lang sa unang hugna atol sa ilang  engkuwentro niadtong 2004, apan nakabawi kini ug ang maong away  misangpot sa panagtabla.

“Talks of rematches and the talk about other opponents don’t matter to me because I’m 100 percent focused on Rocky Juarez,”  sumala pang Marquez.

“I know that the job at hand is a very tough one and I know Rocky Juarez is a tough and dangerous opponent. That’s what I’m focusing on now,” dugang pa niya.