Nagtabla na karon sa ikaduhang puwesto ang Christine ug Amihan sa managsamang 4-2 win-loss record, samtang ang gikaintapang Hero Commando napukan na gyud sa nagpadayong Power Forty Christmas League basketball tournament didto sa Inayawan Sports Complex.
Hinuon, nakabawi usab dayon ang Hero Commando human maangkon ang 74-63 kadaugan batok sa Amihan kinsa maoy nakapilde kanila sa kulbahinam nga duwa, 68-67 niadtong Oktubre 23.
Gitiwasan sab sa Christine ang DJD Eng’g. sa iskor nga 70-60, samtang ang Fag Machine mipahamtang og laing kapildihan ngadto sa UTASSCO, 69-63.
Si referee Peter Lalican mihipos og 24 puntos aron sa pagpangulo sa Hero Commando. Ang Hero Commando mao gihapon nag-una sa ilang 5-1 win-loss nga baraha.
Sila si Joey Escalon ug Ves Eleguin nagkumboya og 38 puntos aron pagpukan sa DJD Eng’g. Si Escalon mikati og 20 puntos ug si Eleguin miamot og 18 puntos, samtang si Edwin Dejacto mitampo og puntos.
Si Efren Mosqueda mipabuhagay og 20 puntos aron baswaton ang Fag Machine ngadto sa kadaugan batok sa UTASSCO nga gipangulohan ni Alex Mercado sa iyang 24 puntos.