Alve Forwarding, Edrose Warriors naghari
Nakalingkawas ang Alve Sea and Air Forwarding human kini panamastamasi sa pagsugod pa lang sa duwa dihang mihasmag kini sa ikatulong kuwarter pinaagi sa pagpaboto og 20-0 run aron paglubong sa Arthro Kontra Arthritis sa iskor nga 89-68 aron paghari sa open division sa 1st Carcar City Mayor's Cup Basketball Tournament sa miaging gabii didto sa nagsugwak nga Carcar Sports Complex.
Ang presensiya sa team sponsor nga si Tony Alve usa sa nakapadasig sa Forwarders diin gipuga ang tanan nilang kusog sa first quarter sa giya ni Richard Ian Saladaga, kinsa milansang og 15 sa maong quarter sa kinatibuk-an niyang 29 puntos.
Bisan og wala ang ilang head coach nga si Al Solis, ang Arthro mipakita gihapon og maayong duwa ug gani ilang nakan-an ang 15 puntos nga alkanse ngadto na lang sa kuwatro puntos, 33-37 sa tunga-tungang bahin sa ikaduhang kuwarter.
Sa tuyo nga dili madiskuwedo, si Aldrin Ocañada milubong og tulo ka triples, samtang si Saladaga mikawot og usa ka triple aron pag-inat og balik sa labaw sa Alve ngadto sa double-digit sa halftime, 38-50. Ila pa kining giinat ngadto sa 30 puntos sa iskor nga 81-31 human masulod ang tulo ka free throws ni Mark Yee human makakuha og foul gikan ni Jeffrey France sa 3-point area.
Gikan niadto, ang Alve mainstays nga gipangulohan ni playing coach ug kanhi PBA star Dale Singson miduwa-duwa na lang sa Arthro ug ilang gipalabi ang pagpatay sa oras inay nga mohimo og opensa.
Sa laing duwa, ang Edrose Warriors milubong sab sa Carcar Water District (CWD) sa iskor nga 93-74 aron pagdaog sa kampiyonato sa 35-above category.
Puntos matag
Alve (89) -Saladaga 29, Yee 16, Torion 14, Ocañada 12, Manigo 6, Marata 5, Redulosa 4, Nicdao 3, Singson 2
Arthro (68) - Cainglet 13, Luga 11, Ursal 9, Ababon 8, Bucao 8, Berame 8, Almacin 7, Mercado 4, Gadiane 3
- Latest
- Trending
