Napulo'g-unom (16) ka teams ang mopakita'g aksiyon sa labing unang UYLESBA Christmas Basketball Tournament nga sugdan karong adlawa diha sa barangay Pagsabungan, dakbayan sa Mandaue.
Ang teams nga salmotan sa mga kabatan-onan nga nag-edad og 18-anyos ug paubos gibahin sa duha ka brackets diin ang matag bracket langkuban og walo ka koponan.
Untop ala-1:00 sa hapon sugdan ang parada nga pagasalmotan sa mga partisipanteng koponan uban sa ilang tagsa-tagsa ka musa gikan sa Elbiña's compound basketball court paingon sa Estero Village ug balik sa Elbiña's compound diin adunay programa nga pagahimuon sa dili pa ang pormal nga kumbati.
Usa sa mga highlights sa maong kalihukan mao ang pagpili og "best muse."
Natukod ang maong kalihukan pinaagi sa United Youth Leaders of Sector 5 Basketball Association (UYLESBA) ubos sa paningkamot nilang Clifford Elbiña, Rey Judilla, Ben Judilla ug Niño Judilla ug sa pag-abag sa managsuong Phil Niño ug Robinson Dacquiado, Francis 'Kubar' Judilla, Niel Labrada ug Yuri Calvez.