Mga Sugbuanong table tennis players ang gihagad sa pag-apil sa 7th Lopue's Table Tennis Association (LOPTTA) National Invitational Table Tennis Championship karong Nobiyembre 9-11 didto sa LOPTTA Table Tennis Center sa Lopue's San Sebastian Annex building sa Bacolod City.
Si Dr. Leonito Lopue, ang presidente sa LOPTTA, naglaum nga uban sa mga Sugbuanong magduduwa, matuman sa hingpit ang ilang tuyo sa pagkaplag og mga maayong players gikan sa nagkalain-laing mga kahugpongan, tunghaan ug ingon man sa
rehiyon.
Hinuon, gitataw ni Lopue nga ang mga sakop sa RP team ug ang ilang coaches dili mahimong makasalmot sa maong kompetisyon. Ang mga magduduwa kinsa nakaduwa sa RP team gikan sa 1990 o sayo pa gikonsiderar nga "non-ranking players" ug mahimo kini nga moduwa.
Ang makampiyon makadawat og P25,000, samtang ang runner-up makabulsa og P15,000. Ang third placer makaangkon og P10,000 ug ang mopahiluna sa ikaupat nga dapit gantihan og P5,000.
Gawas niining mga premyo, adunay cash incentives nga madawat sa mga magduduwa sa tibuok torneyo. Ang single players hatagan og P100 matag duwa nga iyang madag-an atol sa elimination round, P300 atol sa duwa alang sa third place ug P500 sa championship round.
Ang team nga moposte og 3-0 win-loss record sa eliminasyon makadawat og P300. Ang team nga magpadayon pagkutlo og daog atol sa semifinal makaangkon og P600 ug usa ka libo atol sa kampiyonato.
Ang entry free nagkantidad og P1,000.