Bigatin din ang kalaban ni Donaire

Katulad ng mga Mexican fighters, isa ring tigasin at agresibong boksingero si Luis Maldonado, ayon kay Filipino world flyweight champion Nonito “The Filipino Flash” Donaire, Jr.

“He’s a typical Mexican fighter who always wants to go out there fight and give everything he got until he wears you down,” wika ng 24-anyos na si Donaire kay Maldonado.

 Itataya ni Donaire ang kanyang International Boxing Federation (IBF) at International Boxing Organization (IBO) flyweight titles laban kay Maldonado sa Disyembre 2 sa Foxwoods Resort and Casino sa Mashantucket, Connecticut.

Ito ang kauna-unahang title defense ng tubong General Santos City na si Donaire matapos patulugin si dating IBF at IBO titlist Vic Darchinyan sa fifth round noong Hulyo 7 sa Bridgeport, Connecticut.

Tangan ni Donaire, nasa isang 17-fight winning streak ngayon, ang 18-1-0 win-loss-draw ring record kasama ang 11 KOs, habang ibinabandera naman ni Maldonado ang 37-1-1 (28 KOs) slate. (RC)