Miarangkada ang University of San Carlos (USC) Warriors human nila gipukan ang St. Louis University sa Baguio City sa ikaduhang adlaw sa kulbahinam nga mga aksiyon sa men’s volleyball event sa 2007 National University Games (Uni-Games) kagahapon didto sa University of St. La Salle (USLS)-Bacolod Gym.
Ang USC, kinsa maoy defending champion sa CESAFI men’s volleyball nakahimo pa sa paggukod pinaagi sa usa ka five-setter nga kadaugan nga milungtad og duha ug tunga sa oras nga kumbati.
Human sila gipilde sa SLU sa unang set, 23-25, mibawos ang USC ug giangkon ang ikaduha ug ikatulo nga sets, 25-17, 25-20 pinaagi sa mga makabungog nga spikes ug ingon sa maayong depensa ni USC team captain Roderick Arenasa, Edward Carlo Tecson, Jerone Maestre, Kenneth Bensig, Mark Pepito ug Dennis Gepolvida.
Gisulayan pagtapos sa USC ang duwa, apan wala nila mapugngi ang SLU nga determinadong modaog sa ikaupat nga set, 25-21.
Nag-una ang SLU sa unang minuto sa ilang deciding set apan dali kining napakgang sa Warriors ug ilang nailog ang labaw, 12-9, pinaagi sa maayong diskarte ni Arenasa.
"In the first set we had a lot of miscommunication, we had a lot of bad play, and we were not our usual selves. It seems that we are still adjusting because SLU was quite a tough opponent. However, we were able to recover in the second and third sets and all of us were in high-spirits, which is one of the reasons for our team’s victory," matud pa ni USC team captain Arenasa.
"We are hoping to perform well in our game tomorrow against another powerhouse team, the University of Sto. Tomas," dugang pa ni Arenasa.
Sa basketball, ang USC Warriors nga maoy runner-up sa CESAFI collegiate basketball tournament, mikulata sa La Carlota College, 90-66 didto sa USLS basketball gym.
Sila si two-time CESAFI MVP Enrico Llanto, Niño Ramirez, Carlo Padayao, Giovanni Padillo, Sam Hermosa ug Robert Codilla maoy nangulo sa nag-uros-uros nga pangatake sa Warriors.
Sunod makontra sa Warriors men’s basketball team ugma mao ang St. Francis of Assissi sa alas-9:00 sa buntag ug sa pagka-hapon ang Ateneo de Zamboanga nga gitakda sa alas-4:00 sa hapon.