Jaguars 'kadlit og daog

Miposte dayon og daog  ang University of San Jose- Recoletos  (USJ-R) Jaguars human nila giihaw ang St. Louise University sa Baguio City sa opening game sa University Games didto sa De La Salle University volleyball courts sa Bacolod City kagahapon.

Wala gyud alang-alanga sa USJ-R Jaguars ang ilang pag-ihaw sa St. Louise University  ug  wala  kini nila padag-a bisa'g  usa  ka set, 22-25, 25-23, 27-25.

Sa laing bahin, napakyas   ang Cebu Schools Athletics Foundation Inc. (CESAFI) defending champion University of San Carlos (USC) Warriors pagsakiyo og daog dihang wala kini makalahutay sa engkuwentro batok sa tag-as nga   Rizal Technological University sa Manila.

Ang  Warriors ni coach Norvie Labuga midaog sa unang set, 25-17 ubos sa hiniusang  puwersa nilang USC team captain Roderick Arenasa, Edward Carlo Tecson ug Jerone Maestre.

Apan ang nagpaniid nga    RTU kalit nga misulbong aron pag-angkon sa sunod duha ka sets, 25-17,  25-19.

Sa ikaupat  nga  set milabaw ang USC, 22-20, apan wala nila mapanalipdi   dihang  nanginit  og maayo ang  RTU aron pagtapos sa duwa, 27-25.

“Okey ra man ang among performance, pero murag dili gyud para amo ang daog. Nalupig mi sa diskarte ug aduna pud silay height advantage,” matud pa ni Roderick Arenasa, ang team captain sa USC.

Ang  USC Warriors makigsangka sa St. Louise University ugma sa ala-1:00 sa hapon didto  sa De La Salle University volleyball courts.