Nangahas ang Plantation Bay-Team Cebu pag-angkon sa ilang ikatulong titulo sa dihang moapil kini sa 7th Carrera Habagat Siargao-Bucas Grande Traverse nga mosikad karong adlawa didto sa Siargao, Surigao del Norte.
Ang Plantation Bay-Team Cebu nidaog og titulo sa miaging tuig didto sa Camotes Island ug sa 2004 Race sa Biliran City.
Motimon sa Plantation Bay-Team Cebu alang sa ilang ikatulong titulo mao ang adventure athletes nga sila si Ramises Urgel, Ronie Muring, RJ Balbuena ug Grace Bascon uban sa support crews nga sila si Lloyd Debalucos ug Franz Baguio.
Ang Plantation Bay-Team Cebu maglaum nga makasugat kini og ngilngig nga kaatbang gikan sa Team Manila ni Tumbie Remegio, ang professional adventure racer, kinsa maoy nangulo sa iyang team ngadto sa kampiyonato sa unang Carrera Habagat race didto sa Siargao.
“One of our people here (Grace Bascon) is one of their members. It’s the first time that we sponsored an adventure race team. We are supporting them financially thus, this year, they are racing under our corporate name,” matud ni Jimmy Martinez, ang sports and recreations manager sa Plantation Bay Resort and Spa.
Lain pang Cebu team nga moapil sa maong karera mao ang Team Pepsi nga gilangkuban nilang Rico Valentin, Rodulfo Verdida, Nogie Biagan, hazel Madamba, Franz Baguio ug Macky Hermoso.
“As much as possible I would like a one-two finish for the Cebu teams,” matud pa ni Ramises Urgel sa Plantation Bay-Team Cebu.
Ang Solar Sports maoy mokober ning lima ka adlaw nga Carrera Habagat adventure race, samtang ang Living Asia Channel mao usab ang mo-broadcast sa maong kalihukan.