3rd Capitol Parish Tennis Cup mo-ulbo

Mga dekalibreng tennis players kaniadto ug karon ang mopakita sa ilang abilidad sa pag-ulbo sa 3rd Capitol Parish Tennis Cup karong adlawa  diha sa San Carlos Seminary (SANCASE) tennis courts sa barangay Mabolo, ning siyudad.

Ang tinuig nga  kalihukan   kabahin sa selebrasyon sa adlaw’ng natawhan ni Rev. Fr. Rey Talaugon sa Our Lady of Sacred Heart Parish, nga naila sa kadaghanan nga Capitol Parish  sa dalan Escario.

Si Talaugon kinsa maoy benefactor sa Capitol Parish Development Tennis Training Pool, moduwa sab ubos sa seniors division, pundok sa varsity players nga makigtimbang sa mga beterano nga nagpangedaron og 40 years old and above.

Aduna say team competition alang sa mga junior  players.

Mga bitoon nga angay  atngan  ning usa ka adlaw nga torneyo mao ang  Dumoran brothers nga sila si James ug Oswaldo, Robby Soquiño, Shem Montalbo, Larry Antigua ug ang Siso siblings nga sila si Sally Mae, Bernardine ‘Niño’ ug Sally Dine.

Ang mga mananaog makadawat og ganting salapi, tropeyo ug medalya.