Isle of Man no. 1 elimination

Nakasulod na sa semifinal round ang Isle of Man  human nila mailog ang unang luna sa 3rd M. Lhuillier Kwarta Padala Invitational Softball Tournament  niadtong  Domingo  didto sa San Roque ballpark sa Subangdaku,  dakbayan sa Mandaue.

Ang Isle of Man miposte og upat ka daog ug usa ang pilde paghuman sa eliminasyon.

Ang Isle of  Man mikulit sa ilang ikaupat nga daog  human misurender ang Pau de Arco  human magtabla ang iskor nga 9-all  dihang  ilang  nasayran nga  kun  unsay mahitabo sila   ang makaangkon sa ikaduha nga luna.

Sa maong duwa, ang Isle of Man midaog pinaagi sa tulo ka homeruns, duha gikan ni Sandy Ladisla sa first ug third canto ug Teofilo Sadaya sa third canto.

Sa ilang bahin, ang Pau de Arco mitapos sa  eliminasyon nga adunay tulo ka daog ug duha ang pilde.

Wala kaayo makapatulo sa ilang singot ang Pau de Arco batok sa Pusok Selection. Ang Pusok daan  nang  naluya human sa ilang 0-7 nga kapildihan batok sa defending champion M. Lhuillier Sports and Development Foundation (MLSDF). Ang MLSDF nagkinahanglan lang og lima ka innings pagdaog sa duwa.

Ang Isle of Man ug Pau de Arco mag-abot karong Domingo sa semifinal round diin ang modaog maoy makauna’g kuha og  tiket  sa  finals, samtang ang mapilde moharong sa modaog tali sa MLSDF ug Pusok Selection.