Jewelers mibuntog sa Agilas

Ang trapping defense maoy gihimong taming sa  defending champion M. Lhuillier Kwarta Padala-Cebu City pagbuntog  sa bisitang Goldstar Hardware-backed Duterte Agilas-Davao, 97-93 niadtong miaging gabii sa pagpadayon sa 2007 Mindanao Visayas Basketball Association (MVBA) Second Conference sa Cebu Coliseum.

Si Elazar Berami nakadaginot pa og dos puntos sa undergoal sa katapusang 48 segundos sa duwa aron pagpatabla sa  duwa sa katapusang higayon.

Nabuak ang panagtabla human  mapasulod ni Woodrow Enriquez ang duha niya ka  mahinungdanong free throws human kini makahuha og foul gikan ni  Art Atablanco aron paghatag sa ML Jewelers og dos puntos nga labaw ug napun-an kini og laing dos puntos gikan sa lay-up ni Bruce Dacia sa nahabiling 11 segundos aron pagselyado sa kadaugan.

Nakugang ang ML Jewelers sa maong duwa dihang ang Davao-Agilas mitusik og 16 puntos nga labaw, 23-39 human sa  triple ni Wen John Te sa tunga-tungang bahin sa second period.

Apan sa  usa lang ka pamilok, nahanaw sama sa bangaw ang labaw sa Davao-Agilas gumikan kay sila si Jayford Rodriguez, Gerry Cavan ug Lou Gatumbato mipabuto og upat ka triples nga maoy mihaling sa nagdilaab nga  30-10 run aron pag-abante sa ML Jewelers paghuman sa first half sa iskor nga 53-49.

Human sa duha ka panagtabla (53-all ug 55-all) ang Agilas miilog sa momentum ug milabaw pa kini og otso puntos, 85-77  human sa three point ni Johnny Gonzaga sa nahabiling 5:45 sa duwa.

Katapusang nakatilaw og labaw ang Agilas sa iskor nga 91-89 tungod kay ang ML Jewelers ni sportsman Michel J. Lhuillier ug coach Raul 'Yayoy' Alcoseba milusad og rally aron pag-ilog sa labaw, 93-91 human sa slam dunk ni Ronald Capati sa katapusang 1:31 sa duwa.

Si Dacia maoy topscorer sa ML Jewelers sa iyang 19 puntos, si Capati midugang og 16 puntos, samtang sila si Enriquez, Gatumbato ug Cavan mitunol og 12 puntos alang sa maong kadaugan. Ang Jewelers nagsolo gihapon karon sa ikaduhang dapit sa Visayas Division bitbit ang 6-2 win-loss record.

Si Berami, kinsa mitukob og 26 puntos maoy nangulo sa nanulong nga Davao-Agilas nga nagtinguhang mobangon  atol unya sa  ilang pakigsangka batok sa Visayas Division leader Cebu Landmaster-Mandaue  karong  alas-5:30  diha sa Mandaue City Cultural and Sports  Complex.