Wariors buhi pa

Nakaginhawa ug buhi pa ang underdog University of San Carlos (USC) Warriors human nila mabuntog ang haring gangis University of the Visayas (UV) Green Lancers sa iskor nga 80-77  aron paghatod sa serye sa tinaktakay nga Game-5 nga gitakda ugma sa alas-4:30 sa hapon diha sa Cebu Coliseum.

Ang USC Warriors kinsa wala mohatag og kahigayonan nga molabaw ang UV Lancers miaksiyon og takilid human ang rookie sa Lancers  nga si Sylvester Tancongco nanginit sa ikaupat nga kuwarter aron pagkitkit sa labaw ngadto sa kuwatro puntos sa iskor nga 65-61 human kini malubong og 16 puntos sa tunga-tungang bahin sa ikatulong kuwarter,  35-51.

Bisan pa sa gihimong pagpangatake sa Lancers, ang  Warriors nakahimo gihapon pagpugong sa kainit nilang Chris Victor Diputado ug Ritchum Dennison aron pagpukan sa hingpit sa ilang  mortal  nga  kaaway.

Init kaayo ang maong duwa, gani sila si Diputado ug Ritchum Dennison na-foul out diin ang bugtong gisaligan sa Lancers sa backcourt mao na lang si Von Harry Lanete.

Si Dennison mipakli og 11 puntos, samtang si Diputado igo lang nakabugha og kuwatro puntos.

Ang triple ni Lanete maoy nakapakonsuylo sa Lancers diin miabot na lang og dos puntos ang labaw sa Warriors sa iskor nga 70-72. Katapusang nakasikit ang Lancers sa iskor nga 72-74 gumikan kay ang Warriors mihimo og solidong depensa uban sa pag-ayuda nilang Enrico Llanto ug Niño Ramirez diin ilang giinat og balik ang labaw ngadto sa sayes puntos.

Sa katapusang 27 segundos, gibati'g kalisang ang Warriors human nausik ang duha ka free throws ni Paul Norman Joven, apan gitubos kini ni Sam Jordan Hermosa aron pagseguro sa kadaugan, 80-75 sa nahabiling  9.2  segundos.

Si Ramirez, kinsa mipupo og 27 puntos nangulo sa Warriors, gisundan ni Llanto  nga miamot og 13 puntos, samtang si Joven mikulit og nuybe puntos.

Ang pilderong Lancers gipangulohan ni Lanete sa iyang 14 puntos. Sila si Ariel Mepaña ug Rino Berame mibugha sab og 14 puntos matag usa, si Dennison mitampo og 11.

Si Llanto, kinsa nahimong MVP sa miaging tuig nakig-uban nilang Armand Ponce sa University of San Jose Recoletos, Eric Zanoria sa Southwestern University ug nilang Berame ug Mepaña sa Mythical Five sa collegiate division.

Sa laing bahin, si Junard Premacio, ang leading scoring forward gikan sa University of the Visayas (UV) Baby Lancers ubos ni coach Delfin Pepito Jr. maoy napiling most valuable player sa juniors division.

MGA ISKOR

USC (80) -   Ramirez 27, Llanto 13, Joven 9, Padillo 7, Hermosa 6, Padayao 6, Lazalita 4, Igao 3, Bakker 2, Ferraren 2, Codilla 1

UV (77)  -  Lanete 14, Mepaña 14, Berame 14, Dennison