Panibagong hamon na naman ang haharapin ng Philippine Basketball Association sa pagpapatupad ng mga bagong rules, sa pagpasok ng mga bagong players at panibagong season ngunit optimistiko ang mga Board of Governors na magiging matagumpay ang liga.
Handa sina PBA chairman Tony Chua ng Red Bull at Officer-In-Charge (OIC) Renauld ‘Sonny’ Barrios na tanggapin ang hamon ng 2007-08 season na bubungaran ng Smart Philippine Cup na magsisimula sa Linggo sa Araneta Coliseum.
”We’re all full of hope and excited as we welcome the new season of Asia’s first ever play-for-pay league,” ani Barrios, ang pumalit sa nabakanteng puwesto ni Commissioner Noli Eala, sa pormal na paglulunsad ng panibagong season ng PBA sa Philippine Plaza kahapon.
Kasama nina Barrios at Chua sina PBA Board vice-chairman Joaqui Trillo ng Alaska, treasurer Robert Non ng Magnolia Beverage na dating San Miguel, Purefoods representative Rene Pardo, Guido Zaballero ng sponsor na Smart Communications at Anil Buxani ng official bll na Molten.
Inaprobahan ang tatlong bagong rules para sa handcheck. “With the implementation of these rule, we’re now looking forward to an action-packed and fast-paced game this season,” wika ni Barrios. Ayon kay Chua, magkakaroon ng ‘masayang’ opening ceremonies dahil ang mga host ay ang mga comedian na sina Jose Manalo at Wally Bayola ng Eat Bulaga.
Ang R&B princess na si Kyla ang kakanta ng Pambansang Awit.
Dagdag sa nakalinya nang siyam na provincial games, inaayos ang mga overseas games sa U.S., Dubai, Singapore at Middle East. (MB)