Pulos gipangpilde sa host-Oslob ang lima ka bisitang koponan aron pagdaog sa cluster II-A title sa 3rd Governor Gwen Garcia Unity Volleyball Cup for Women didto sa kaugalingon nilang nataran sa miaging adlaw.
Gidominar sa Oslob ang torneyo bitbit ang 5-0 nga baraha.
Ang Oslob midaog og duha ka duwa sa opening day niadtong Sabado ug midaog sab kini sa Boljoon, Samboan ug Malabuyoc pagka sunod adlaw.
Sa maong kadaugan, ang Oslob moharong sa midaog sa cluster II-B sunod semana didto sa Badian alang sa kinatas-ang puwesto sa cluster II. Modaog ug sa dili, ang Oslob segurado na nga makaangkon og luna sa final round sa nanghinapos nga bahin ning tuiga.
Ang Boljoon ug Santander pulos mitapos sa torneyo nga nagbitbit og managsamang 2-3 win-loss nga baraha, samtang ang Alcoy nasirohan ug wala gyud makatilaw og daog sa lima ka duwa.
Ang aksiyon sa cluster II-B gitakda karong Sabado ug Domingo diin mag-abot ang koponan sa Alegria, Alcantara, Badian, Ronda, Moalboal ug Dumanjug.