Gipakita ni ALA Boxing Gym mainstay Milan Milendo ang iyang kabagsik sa iyang mga katagilungsod pinaagi sa pagpakamang ni Thai Nuapayak Sakkririn sa ikaupat nga hugna aron paglangkat sa World Boxing Organization (WBO) Asia Pacific niadtong Sabado sa gabii didto sa Mindanao Polytechnic State College Gymnasium sa Cagayan de Oro City.
Nabakante ang titulo human ang stablemate ni Milendo nga si Donnie 'Ahas' Nietes, kinsa misakmit sa WBO 105-pound championship pinaagi sa 12-round unanimous decision victory batok sa kanhi walay pildeng Thai knockout artist Pornsawan Kratingdaenggym sa niadtong Septiyembre 30 didto sa grand ballroom sa Waterfront Cebu City Hotel and Casino sa barangay Lahug, ning siyudad.
Si Milendo mipalanding sa iyang naghaguros nga right straight ug naigo sab kini sa wala nga kamot nga nakapahapla sa Thai boxer sa canvas sa oras nga 2:58 sa ikaupat nga hugna.
Gawas sa pag-inat sa iyang way buling nga baraha ngadto sa 13-0 gisabayan og upat ka knockouts, si Melindo nahimong ikaduhang WBO regional titlist gikan sa ALA Stable sud lamang sa unom ka adlaw.
Sa undercard sa away ni Nietes, si AJ 'Bazooka' Banal mi-iskor makalisang nga first-round stoppage sa Mehikanong si Esau Gaona aron pagdaog sa bakus sa WBO Youth super flyweight division.
Sa laing bahin, nahanaw sama sa bangaw ang tinguha ni Eden Sonsona nga mosakmit sa Oriental and Pacific Boxing Federation (OPFB) jr. bantamweight title dihang napilde kini pinaagi sa desisyon batok sa Hapon nga si Kohei Kono didto sa Korakuen Hall sa Tokyo.
Si Sonsona nagbitbit og 12-2 win-loss uban ang 2KOs, samtang si Kono miinat sa iyang baraha ngadto sa 23-3 diin pito niini ang gipakamang.