Team Pacman mangulo sa 1st MP Cup

Wala makaigo sa ilang target apan  nanobra  hinuon  ang mga  koponan nga mosalmot sa 1st MP Cup basketball tournament nga gipasiugdahan ni boxing superstar Manny Pacquiao nga mosikad karong Oktubre 14 diha sa University of San Carlos (USC)-main gym.

Ang mga tigpasiugda mibana-bana nga 12 ra ka teams ang mosalmot niini, apan miambak hinuon kini ngadto sa 18 ka teams atol sa  organizational meeting nga  gipangulohan ni event coordinator  ug kanhi Cebu City  councilor George Rama ug technical officials Rico Navarro ug Danny Duran kagahapon   sa Conching's Native Restaurant sa north reclamation area.

Mangulo sa talaan sa mga partisipante mao ang Team Pacman ni Pacquiao, Cebu Sports Media Association (CSMA),   United Architects' Basketball Club (UABC), Cebu Eastern College Alumni Basketball Association (CECABA), San Carlos Boys High Alumni Basketball Association (SCBHABA), Barkadahan-Rama Boys, RWS  Stable ug ang Metro Cebu Basketball Association (MCBA).

Lain pang mga koponan nga mosalmot mao ang Club Monday, Iglesia Ni Cristo (INC), Kidney Care-Arthro, Dewfoam-CECABA Batch '88, Punta Princesa Sports Association (PPSA), House of Hope, Integrated Bar of the Philippines (IBP), Unity Basketball Club (UBC), PAGCOR-Waterfront Airport Hotel ug Jaycees Basketball Association (JBA).

Ang mga partisipanteng koponan gibahin ngadto sa duha ka grupo.

Ang matag pundok moduwa og single round robin classification round ug ang nag-unang duha ka teams sa matag bracket  moabante sa crossover semifinals diin ang mga mananaog maoy magsangka sa tinaktakay nga kampiyonato.

Ang makampiyon makadawat og P50,000, ang second placer makaangkon og P30,000 ug ang third placer makadawat og P20,000.

Adunay special prize ang itunol sa mamahimong best muse atol sa opening ceremony.  Aduna say special awards ngadto sa regular season ug finals  MVPs ug maapil  sa Mythical Five.

Ang duha ka buwan nga torneyo alang lamang niadtong mga magduduwa nga nagpangedaron og 30-anyos ug pataas.

Makaikyas sa age limit   mao ang Team Pacman ug ang Cebu Media.

Ang matag koponan gitugotan nga mopaduwa og 15 ka players hinuon ug gidid-an sab sa pagduwa ang former commercial ug college varsity players.

Ang deadline sa pagduso sa mga entries karong Oktubre 10 atol unya sa final meeting diha gihapon sa Conching restaurant.