MP Pacman mibawos sa ML Jewelers

Sa labing unang higayon sa duha ka tuig nga kasaysayan sa Mindanao Visayas Basketball Association (MVBA), ang MP Warriors-GenSan ni boxing superstar Manny Pacquiao  nakatilaw na gyud og daog batok  sa M. Lhuillier Kwarta Padala-Cebu City  human   ilang gi-knock out ang bisitang koponan, 86-70, niadtong Sabado sa gabii didto sa Digos City Stadium.

Gipahimuslan og maayo sa Warriors ni coach Ramon Pido ang  kaluya sa Jewelers, kansang kalawasan namoypoy gumikan sa walo ka oras nilang biyahe gikan sa Cagayan de Oro padulong sa  dakbayan sa Digos.

Maayo hinuon ang gipakitang labok sa M. Lhuillier pagsugod sa duwa ug nakalabaw pa gani kini og dos puntos human sa first half, 42-40.  Apan gibati na'g kakapoy ang Jewelers sa second half hinungdan nga gilat-an sila sa MP Warriors.

Sa nahabiling 5:23 sa duwa, wala na makapasud bisa'g  usa na lang ka field goal ang Jewelers. Niadtong puntoha, ang Warriors mikulit og 12 puntos, walo gikan ni Erian Daja samtang ang upat gikan ni Rolly Menor. Bugtong konsolasyon sa M. Lhuillier mao ang paglansang niini og tulo ka free throws.

Si Ronald Capati mihatag sa  M. Lhuillier sa katapusan niining labaw, 51-50, sa tunga-tungang bahin sa ikatulong kuwarter gumikan kay si Daja mikolekta og upat ka sunod-sunod nga puntos aron pagpalabaw sa Warriors, 54-51.

Gumikan niini, ang Warriors nakatabla na sa ilang biktima bitbit ang managsamang 2-2 win-loss records.

Si Daja maoy nangu sa Warriors sa pagkulit niini og 18 puntos, samtang si Menor midugang og 16 puntos. Si Donald Tadena mipugnit og siyam sa iyang 12 puntos sa unang kuwarter.

Si Dacia maoy nanghawod sa kampo sa Jewelers bitbit ang 16 puntos nga pulos niya natali sa ikaduhang kuwarter. Gisundan kini ni Capati nga midonar og 12 puntos.