Tinguha sa Team Isleman nga mokulit sa ilang sunod-sunod nga daog sa pagpadayon sa 3rd M. Lhuillier Kwarta Padala Invitational Softball Tournament karong adlawa diha sa San Roque ballpark sa Subangdaku, dakbayan sa Mandaue.
Ang Isleman mihipos sa ilang unang daog pinaagi sa pagpukan sa defending champion M. Lhuillier Sports and Development Foundation (MLSDF), 8-3 atol sa opening day.
Sunod nga sangkaon sa Isleman mao ang Pusok Selection.
Sa laing bahin, ang MLSDF nanghinaot nga makabawi sa ilang kapildihan sa dihang ilang sangkaon ang Berns Ang.
Ang MLSDF gituohang maoy mopatigbabaw sa ilang duwa batok sa Berns Ang gumikan kay ang naulahi makuhaan na og kusog ug maluya na kini sa ila unyang pakigharong sa defending champion kay gitakda man kining moduwa batok sa Pau de Arco sa opener.
Sama sa Berns Ang, ang Pau de Arco ug Pusok aduna say duha ka duwa karong adlawa.