Nakaangkon og dakung break sa iyang boxing career ang Sugbuanong boksidor nga si Bert Batawang sa SGG Stable kay gitakda kining mohagit ni defending champion Ulises Solis alang sa International Boxing Federation (IBF) lightweight title ubos sa Top Rank promotion karong Septiyembre 16 didto sa Hard Rock Cafe sa Las Vegas, Nevada.
“When everybody was crying that Batawang doesn’t fight, I went back to work to the table and did my homework. I found out that Solis was looking for an opponent and Batawang is rated and doesn’t have to go through an elimination. He will go straight to a world title,” matud pa ni international matchmaker Sampson Lewkowicz sa taho sa philboxing.com.
Si Batawang moaway unta ni Gerardo Verge sa IBF jr flyweight eliminator sa Philippines vs. Mexico Boxing World Cup niadtong Domingo didto sa Arco Arena sa Sacramento, California, apan si Verde miatras sa maong card tungod sa problema sa iyang duha ka mata.
Ning bag-ong kalamboan, adunay purohan si Batawang nga makabawos sa kaparotan sa iyang kauban nga si Rodel ‘Batang Mandaue’ Mayol, kinsa natumba sa ikawalong hugna atol sa pagdepensa ni Solis sa iyang korona niadtong Agosto 4 didto sa All-State Arena sa Chicago, Illinois.
Kun masuwertihan si Batawang, makaambit unya kini sa rekord ni Gerry Peñalosa isip oldest Filipino world boxing champion sa edad nga 35. Gipalagpot ni Peñalosa si Jhonny Gonzalez human kini midaog pinaagi sa 7th round knockout aron pag-angkon sa WBO bantamweight title.