M. Lhuillier gitiwasan sa Arthro
Nagpadayon ang dominasyon sa Arthro Kontra Arthritis batok sa M. Lhuillier Kwarta dihang gitiwasan kini, 96-92 aron pagdaog sa ilang "best-of-three" exhibition series niadtong Domingo sa gabii didto sa Carmen Sports Complex sa Carmen, Cebu.
Init kaayo ang gipakitang duwa sa Arthro ni sports patron Jonathan 'Atan' L. Guardo ug coach Al Solis apan kalit kining namugnaw. Hinuon nakabawi kini sa second half aron pagbihag sa M. Lhuillier sa ikapitong higayon sa siyam nila ka duwa ning tuiga.
Teamwork ang naghatod sa Arthro ngadto sa kadaugan gumikan kay unom ka players niini ang mitali og kapin sa 10 puntos nga gipangulohan ni Mark Ababon, kinsa mihipos og 17 puntos ug gisundan ni Joseph Ronald 'Baby Shaq' Quiñahan sa iyang 16 puntos.
Sila si Doroteo Almacin, Alex Cainglet, ug Bernie Ursal nagkumboya og 42 puntos alang sa Arthro nga miposte og 23-18 nga bentaha human sa nag-unang 10 minutos sa duwa.
Gumikan sa paningkamot nilang Leo Bat-og ug Woodrow Enriquez, ang Jewelers ni Michel J. Lhuillier ug coach Raul 'Yayoy' Alcoseba migukod pinaagi sa paglusad og 29-18 run hinungdan nga nakabentaha kini paghuman sa first half, 47-41.
Apan wala sab magpabitin ang Arthro gumikan kay mipabuto kini og makabungog nga 29-15 run sa ikatulong kuwarter aron pag-ilog og balik sa labaw, 70-62, padung sa katapusang kuwarter.
- Latest
- Trending
